जलेश्वर–बर्दिबास सडकखण्डअन्तर्गत महोत्तरीको बथनाहामा आज बिहान भएको भीषण सडक दुर्घटनामा परी तीन जनाको मृत्यु भएको छ भने अन्य तीन जना गम्भीर घाइते भएका छन् ।
दुईवटा मोटरसाइकल आपसमा ठोक्किँदा आगलागी भई दुर्घटना भएको प्रहरीले जनाएको छ । जिल्ला प्रहरी कार्यालय महोत्तरीका अनुसार मृत्यु हुने तीनै जना करिब २० वर्ष उमेरका विद्यार्थी रहेका छन् ।
मृत्यु हुनेमा जलेश्वर नगरपालिका–६ का शुभाष दास, सोही स्थानका रवि दास र एकडारा गाउँपालिका–३ का अभिषेक मण्डल रहेका छन् ।
जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) शैलेन्द्र भट्टका अनुसार घटनास्थलमा जलेका शवहरू आफन्तले पहिचान गरेपछि मात्र सनाखत गरिएको हो ।
दुर्घटनामा जलेश्वर नगरपालिका–६ का रोहित दास, अभय कापर तथा एकडारा गाउँपालिका–५ बथनाहाका अजय कापर गम्भीर घाइते भएका छन् ।
घाइतेहरूको स्थानीय अस्पतालमा उपचार भइरहेको छ भने उनीहरूको अवस्था चिन्ताजनक रहेको प्रहरीले जनाएको छ ।
प्रहरीले घटनाबारे थप अनुसन्धान गरिरहेको जनाएको छ ।
