काठमाडौं — गएको वैशाखदेखि फागुन मसान्तसम्म देशभर विभिन्न प्रकारका विपद्का ६ हजार ७९९ वटा घटना भएका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार यस अवधिमा विपद्मा परेर ४६४ जनाको ज्यान गएको छ भने ३८ जना अझै बेपत्ता रहेका छन्। त्यस्तै ११ महिनामा १ हजार ८१४ जना घाइते भएका छन्।
प्राधिकरणका अनुसार विपद्का कारण देशभर १२ हजार ४ सय ५८ घरपरिवार प्रभावित भएका छन्।
तथ्याङ्कअनुसार सबैभन्दा धेरै आगलागीका घटना भएका छन्। ११ महिनाको अवधिमा ३ हजार ३३९ वटा आगलागीका घटना हुँदा ९८ जनाको ज्यान गएको छ।
यसैगरी बाढीका ३१८, पहिरोका ५९०, ठूलो वर्षाका ४२९, चट्याङका ३६७, सर्पदंशका ५९२ र डढेलोका २४६ वटा घटना भएका छन्।
त्यस्तै हावाहुरीका २९२, जनावर आक्रमणका ४८८ तथा लेक लागेका ११९ वटा घटना भएको प्राधिकरणको तथ्याङ्कमा उल्लेख छ। प्राधिकरणले विपद् जोखिम न्यूनीकरणका लागि सचेतना, पूर्वतयारी तथा सुरक्षित व्यवहार अपनाउन सबैलाई आग्रह गरेको छ।
