१३ जेठ,वीरगञ्ज । मनसुन नजिकिएसँगै वीरगञ्ज महानगरपालिकाले नगर क्षेत्रभित्रका मुख्य तथा सहायक नालाहरूको सफाइ अभियानलाई तीव्रता दिएको छ। बाढीजन्य जोखिम न्यूनीकरण गर्न र वर्षौंदेखि अवरुद्ध रहेका नालाहरूको सरसफाइलाई महानगरले प्राथमिकतामा राखेको हो।
महानगर प्रमुख राजेशमान सिंहको नेतृत्वमा मंगलबार वडा नम्बर ११ र १३ अन्तर्गत पर्ने मुख्य नालाको स्थलगत अनुगमन तथा निरीक्षण गरिएको छ। टोलीले अल्पाइन स्कुल हुँदै श्रीपुर क्षेत्रसम्म फैलिएको नालाको अवस्था अध्ययन गरेको थियो।
निरीक्षणका क्रममा नालाहरू अतिक्रमणमा परेको, लामो समयदेखि सफाइ नहुँदा पानीको निकास अवरुद्ध भएको र बाढीको समयमा जलजमावको समस्या देखिएको पाइएको छ।
स्थानीयबासीले अनुगमनका क्रममा घरभित्रसम्म पानी पस्ने, दुर्गन्ध फैलिने र स्वास्थ्यमा प्रतिकूल असर पर्ने समस्याबारे महानगर प्रमुखसमक्ष गुनासो गरेका थिए। स्थानीयको समस्या सुनेपछि प्रमुख सिंहले तत्काल नाला सफाइ र अतिक्रमण हटाउने निर्देशन दिएका छन्।
“स्थानीयको समस्या समाधानका लागि आवश्यक सम्पूर्ण प्रक्रिया अघि बढाइनेछ,“ प्रमुख सिंहले भन्नुभयो, “दीर्घकालीन रुपमा फोहर व्यवस्थापन र नाला संरक्षणसम्बन्धी योजना पनि निर्माण गरिनेछ।“
अनुगमन टोलीमा प्रमुख प्रशासकीय अधिकृत अरबिन्द लाल कर्ण, वडा नम्बर ११ का अध्यक्ष अजय चौरसिया, वडा नम्बर १३ का अध्यक्ष हिरालाल गिरी, सरसफाइ प्रमुख सर्फुदिन अन्सारी, प्राविधिक सल्लाहकार प्रकाश अमात्यलगायतको उपस्थिति रहेको थियो।
वीरगञ्ज महानगरपालिकाले आगामी दिनमा अन्य जोखिमयुक्त क्षेत्रहरूको पनि अनुगमन गर्दै तत्काल समाधान र पूर्वाधार सुधारमा जोड दिने जनाएको छ।
