भोटेकोशी नदीमा आएको बाढीका कारण घाइते तथा जोखिममा परेका नागरिकको उद्धार बिहीबार बिहानैदेखि नेपाली सेना तथा निजी क्षेत्रका हेलिकोप्टरमार्फत तीव्र पारिएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणको बुधबार साँझ बसेको बैठकले प्रभावित क्षेत्रका घाइतेलाई तत्काल उद्धार गरी प्रारम्भिक उपचारका लागि रसुवाको धुन्चे र नुवाकोटको विदुरस्थित नेपाली सेनाको ब्यारेकमा स्थापना गरिएका शिविरमा लैजाने निर्णय गरेको हो ।
गृह मन्त्रालयका प्रवक्ता आनन्द काफ्लेका अनुसार गम्भीर घाइतेलाई प्राथमिकताका आधारमा तत्काल उद्धार गरी काठमाडौँ ल्याउने तयारी गरिएको छ । घाइतेको अवस्था मूल्याङ्कन गरी उद्धार तथा उपचारलाई प्राथमिकता दिइने उहाँले जानकारी दिनुभयो ।
बाढी प्रभावितका लागि आवश्यक राहत सामग्रीसमेत स्थलमार्ग हुँदै विदुरस्थित नेपाली सेनाको ब्यारेकतर्फ पठाइएको छ ।
रसुवामा बाढीबाट प्रभावित नागरिकको उद्धारका लागि नेपाली सेनाका सात र निजी क्षेत्रका आठ गरी १५ वटा हेलिकोप्टर परिचालन गरिएको छ। हालसम्म नेपाली सेनाका हवाई साधनमार्फत ९७ जनाको उद्धार गरिएको जनाइएको छ ।
यसैबीच, वीर अस्पतालबाट खटिएको मेडिकल टोलीले त्रिशूलीस्थित नं. १ सैन्य तालिम केन्द्रमा घाइतेको आपत्कालीन उपचार गरिरहेको छ । विपद् व्यवस्थापनमा प्रयोग हुने एक सेट फिल्ड अस्पतालसहित आवश्यक औषधि, मेडिकल सामग्री तथा उपकरणसमेत त्रिशूलीतर्फ पठाउने व्यवस्था मिलाइएको छ ।
उद्धारसँगै प्रभावित क्षेत्रमा राहत तथा स्वास्थ्य सेवा विस्तार गर्ने कामलाई पनि प्राथमिकताका साथ अघि बढाइएको सम्बन्धित निकायले जनाएको छ ।
