वीरगञ्जमा विशेष धार्मिक कार्यक्रम आयोजना हुने भएको छ। हिन्दु पत्रकार संघ पर्साका अध्यक्ष राजन रौनियारको अध्यक्षतामा आयोजित पत्रकार सम्मेलनमार्फत नगवा दुर्गा पूजा समितिले कार्यक्रमबारे जानकारी दिएको हो।
समितिका अनुसार “श्री १०८ सप्ताह हनुमान चालीसा पाठ” सम्पन्न भएको अवसरमा “श्री हनुमान आराधना तथा महाआरती” कार्यक्रम आयोजना गर्न लागिएको छ। कार्यक्रम बैशाख १ गते मंगलबार वीरगञ्ज महानगरपालिका–नगवा पोखरीस्थित श्री बैधि माई मन्दिर परिसरमा सञ्चालन हुनेछ।
आयोजकले दिएको जानकारी अनुसार हनुमान आराधना बिहानदेखि साँझ ५ बजेसम्म चल्नेछ भने महाआरती साँझ ६:३० बजे सुरु हुनेछ। महाआरतीपछि भक्तजनका लागि प्रसाद वितरणको व्यवस्था समेत गरिएको छ।
समितिले कार्यक्रममा सहभागी भई धार्मिक पुण्य लाभ लिन सम्पूर्ण भक्तजन तथा स्थानीयवासी, विशेषगरी वीरगञ्जबासीलाई उपस्थितिका लागि अनुरोध गरेको छ।
