बारा — जगदम्बा स्टिल प्रा.लि. बाट दैनिक रूपमा निस्कने कालो धुवाँका कारण जितपुरसिमरा उपमहानगरपालिका–२ का स्थानीयवासी आक्रोशित बनेका छन्। उद्योगको प्रदूषणले वातावरणसँगै जनस्वास्थ्यमा समेत गम्भीर असर पारेको स्थानीयको गुनासो छ।
स्थानीयका अनुसार पटक–पटक समस्या उठाए पनि समाधानको सट्टा आवाज दबाउने प्रयास भएको आरोप छ। उद्योगसँग सम्बन्धित बिचौलिया र दलालहरू सक्रिय भएर विरोध कमजोर पार्ने प्रयास गरिएको दाबी पनि गरिएको छ।
त्यसैगरी, उपमहानगरपालिकाका केही जनप्रतिनिधिहरूले यस विषयमा चासो नदेखाएको भन्दै स्थानीयमा असन्तुष्टि बढ्दै गएको छ।
प्रदूषणका कारण धेरै नागरिकको स्वास्थ्यमा समस्या देखिएको, केहीको ज्यानसमेत गएको र दर्जनौं परिवार शोकमा परेको स्थानीयवासीको दाबी छ। तर, यस्ता गम्भीर समस्याका बाबजुद सम्बन्धित निकायबाट दीर्घकालीन समाधान नआएको उनीहरूको भनाइ छ।
स्थानीयहरूले सामाजिक सञ्जालमार्फत प्रमाणसहित समस्या उजागर गर्न र जनप्रतिनिधिहरूलाई जवाफदेही बनाउन आह्वान गरेका छन्। उनीहरूले “अब आफ्नै गाउँ–सहर आफैं जोगाउनुपर्ने अवस्था आएको” भन्दै एकजुट भएर प्रदूषणविरुद्ध आवाज उठाउन सबैलाई आग्रह गरेका छन्।
