महोत्तरी — महोत्तरीको जलेश्वर–बर्दिबास सडकखण्डअन्तर्गत बथनाहा गाउँमा दुई मोटरसाइकल एकआपसमा ठोक्किँदा भएको दुर्घटनामा तीन जनाको मृत्यु भएको छ भने तीन जना घाइते भएका छन्।
दुर्घटनामा ज्यान गुमाउनेहरूमा जलेश्वर नगरपालिका–६का २० वर्षीय शुभाष दास र २० वर्षीय रवि दास तथा एकडारा गाउँपालिका–३का २० वर्षीय अभिषेक मण्डल रहेका प्रहरीले जनाएको छ।
घाइते हुनेहरूमा जलेश्वर–६ कै १९ वर्षीय रोहित दास, १९ वर्षीय अभय कापर तथा एकडारा–५ बथनाहाका २० वर्षीय अजय कापर रहेका छन्। उनीहरूको प्रादेशिक अस्पताल जलेश्वरमा उपचार भइरहेको जिल्ला प्रहरी कार्यालय महोत्तरीका प्रहरी नायब उपरीक्षक शैलेन्द्र भट्टले जानकारी दिए।
आज बिहान विपरीत दिशाबाट आइरहेका मोटरसाइकलहरू एकडारा गाउँपालिका–५ बथनाहा क्षेत्रमा एकआपसमा ठोक्किँदा दुर्घटना भएको हो। दुर्घटनामा परेका सबै विद्यार्थीहरू माध्यमिक शिक्षा परीक्षा (एसईई) दिएर फर्किरहेका थिए।
