नेपाल आयल निगमले पेट्रोलियम पदार्थको मूल्य फेरि बढाएको छ। बुधबार जारी प्रेस विज्ञप्ति अनुसार पेट्रोल, डिजेल र मट्टीतेल सबैमा समान १५ रुपैयाँ मूल्यवृद्धि गरिएको छ।
निगमले जारी गरेको विज्ञप्तिमा उल्लेख भए अनुसार, विगत एक महिनादेखि पश्चिम एसियामा जारी युद्धका कारण अन्तर्राष्ट्रिय बजारमा पेट्रोलियम पदार्थको निरन्तर मूल्यवृद्धि भइरहेको छ। सो युद्धका कारण १६ देखि ३१ मार्चसम्म करिब ५ अर्ब रुपैयाँ घाटा हुने देखिएको र आगामी १५ दिनमा थप १५ अर्ब घाटा हुने अनुमान गरिएको छ।
नयाँ मूल्य अनुसार पहिलो वर्गका शहरहरू—चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी र विरगन्जमा पेट्रोलको मूल्य प्रतिलिटर १८४ रुपैयाँ ५० पैसा कायम हुनेछ।
दोस्रो वर्गका शहरहरू—सुर्खेत र दाङमा पेट्रोलको मूल्य १८६ रुपैयाँ, जबकि तेस्रो वर्गका शहरहरू—काठमाडौं, पोखरा र दिपायलमा १८७ रुपैयाँ कायम गरिएको छ।
निगमले अन्तर्राष्ट्रिय बजारमा भएको आकस्मिक मूल्य वृद्धिका कारण उत्पन्न विषम परिस्थितिमा सबै उपभोक्ता र सरोकारवालासँग सहयोगको आह्वान गर्दै पेट्रोलियम पदार्थको प्रयोगमा मितव्ययिता अपनाउन अनुरोध गरेको छ। साथै, अन्तर्राष्ट्रिय बजारमा मूल्य घट्दा तत्काल मूल्य समायोजन गरिने समेत विज्ञप्तिमा उल्लेख गरिएको छ।
यसअघि पनि नेपालमा पेट्रोलियम पदार्थको मूल्य बढाइएको थियो।
