रवि लामिछानेमाथि लगाइएको संगठित अपराध र सम्पत्ति शुद्धीकरणसम्बन्धी मुद्दा फिर्ता गर्ने निर्णयविरुद्ध दायर रिट निवेदनमाथि सर्वोच्च अदालतमा आज पनि सुनुवाइ जारी छ।
न्यायाधीशद्वय विनोद शर्मा र अब्दुल अजिज मुसलमानको संयुक्त इजलासमा रहेको उक्त मुद्दा केही दिनयता हेर्दाहेर्दैमा राखेर निरन्तर सुनुवाइ भइरहेको हो।
यसअघि मंगलबार रिट निवेदक पक्षका कानुन व्यवसायीहरूले बहस गरेका थिए। आज भने महान्यायाधिवक्ता कार्यालयका तर्फबाट सरकारी वकिलहरूले जवाफी बहस प्रस्तुत गर्ने कार्यक्रम छ।
महान्यायाधिवक्ता सविता भण्डारीले पुस ३० गते लामिछानेको हकमा अभियोगपत्र संशोधन गर्ने निर्णय गरेकी थिइन्। त्यसपछि आलोचना बढेपछि उनले २ माघमा अन्य सबै आरोपितहरूको हकमा पनि सोही निर्णय लागू गरेकी थिइन्।
यसअघि सर्वोच्च अदालतले महान्यायाधिवक्ता कार्यालयको मुद्दा फिर्तासम्बन्धी निर्णयका कागजातसमेत झिकाइसकेको छ।
