वीरगन्ज — राष्ट्रिय स्वतन्त्र पार्टी (रास्वपा) ले पार्टीका नेताकार्यकर्तालाई कसैले पनि आफूलाई वीरगन्ज महानगरपालिकाको मेयर वा वडाध्यक्ष पदको उम्मेदवार बताउँदै प्रचार नगर्न सचेत गराएको छ।
फागुन २१ को निर्वाचनमा रास्वपाले पर्सासहित देशभर दुई तिहाई बहुमत हासिल गरेलगत्तै केही युवा नेताहरूले फेसबुक, टिकटक र अन्य सामाजिक सञ्जालमार्फत आगामी स्थानीय तहको निर्वाचनमा आफू उम्मेदवार हुने प्रचार गरिरहेका थिए।
यसलाई लक्षित गर्दै रास्वपा पर्साले शनिबार प्रेस विज्ञप्ति जारी गर्दै स्पष्ट पारेको छ कि पार्टीले अहिलेसम्म कुनै पदको उम्मेदवार तय गरेको छैन। रास्वपा पर्साका सचिव सुदिश प्रजापति ले पार्टीभित्रका गलत, भ्रामक र कपोलकल्पित प्रचारबारे सचेत रहन र विश्वास नगर्न अनुरोध गरेका छन्।
विज्ञप्तिमा भनिएको छ कि केही व्यक्तिहरूले आफूलाई रास्वपाका तर्फबाट मेयर वा वडाअध्यक्षको उम्मेदवार ठहराउँदै प्रचार गरिरहेका पाइएपछि आजको मितिदेखि त्यस्ता गतिविधि नगर्न सचेत गराइएको हो।
