रूपन्देही — कपिलवस्तु महाराजगञ्जमा हिन्दू र मुस्लिम समुदायबीच विवाद चर्किन नदिन जिल्ला प्रशासनले निषेधाज्ञा जारी गरेको छ।
जिल्ला प्रशासन कार्यालय कपिलवस्तुले दिउँसो २ बजेदेखि महाराजगञ्जको पूर्वमा बर्गदी पुल, पश्चिममा बहादुरगञ्ज चोक, उत्तरमा महाराजगञ्ज बजार र दक्षिणमा हर्दौना क्षेत्रमा कुनै भेला, सभा, जुलुस वा प्रदर्शन नगर्न आदेश दिएको छ।
विवाद महाराजगञ्ज वडा नं. २ र ३ को सीमा क्षेत्रमा मुस्लिम समुदायले ईद मनाइरहेका बेला र हिन्दूहरूले नवरात्रि अवसरमा दुर्गा माताको पूजा गर्दै भजनको आवाज चर्को बनाएपछि सुरु भएको थियो। विवाद बढ्दा प्रहरीले ७ राउन्ड अश्रु ग्यास प्रहार गरी नियन्त्रणमा लिएको थियो।
झडपमा प्रहरी, हिन्दू र मुस्लिम समुदायका गरी एक बालकसहित कुल ६ जना घाइते भएका छन्। जिल्ला प्रहरीले दुवै पक्षलाई संयम अपनाउन आग्रह गर्दै व्यापक परिचालन मार्फत स्थिति नियन्त्रणमा राखेको छ।
