काठमाडौं — मध्यपूर्वमा तीन हप्तादेखि जारी युद्धले विश्वव्यापी असर पारेको छ। पेट्रोलियम पदार्थको मूल्य बढ्दा जनजीवन र अर्थतन्त्र जोखिममा परेको छ भने पर्यटन क्षेत्र समेत प्रभावित भएको छ।
इरानले आफ्नो आक्रमणलाई विश्वका पर्यटन तथा मनोरञ्जन स्थलसम्म फैलाउने चेतावनी दिएको छ। आज पनि इरानले मिसाइल आक्रमण जारी राखेको छ। साउदी अरेबियाले बिहानै २० ड्रोन निस्क्रिय पारिएको जानकारी दिएको छ। प्रभावित क्षेत्रमा मुख्य तेल प्रतिष्ठानहरू रहेको र हर्मुज मार्गमा इरानको अबरोध कायम रहेको छ।
इरानी सर्वोच्च नेता मोज्तबा खामेनी ले नवरोज पर्वको अवसरमा सम्बोधन गर्दै अमेरिकी र इजरायली आक्रमण असफल भएको बताउनुभएको छ। इरानी सेनाका उच्च अधिकारीहरूले “विश्वका पार्क, मनोरञ्जन क्षेत्र र पर्यटन स्थलहरू शत्रुका लागि सुरक्षित नहुने” चेतावनी दिएका छन्। युद्धमा अहिलेसम्म इरानमा १,३०० भन्दा बढीको मृत्यु भइसकेको छ।
अमेरिकी पक्षमा कम्तीमा १३ सैनिकको ज्यान गएको छ। यसैबीच, डोनाल्ड ट्रम्प ले सामाजिक सञ्जालमा लेख्दै इरानमाथि सैन्य अभियान घटाउने विकल्पमा विचार गरिरहेको जानकारी दिएका छन्। तेल मूल्य वृद्धिसँगै अमेरिकी शेयर बजारमा गिरावट आएको छ।
