काठमाडौं -भारतको मध्य प्रदेश राज्यको इन्दौर मा बुधबार बिहान भएको भीषण आगलागीमा परी सात जनाको ज्यान गएको छ भने तीन जना गम्भीर घाइते भएका छन्।
इन्दौरको बंगाली चौराहानजिकै रहेको एक कोलोनीमा बिहान करिब ४ बजे घटना भएको हो। त्यसबेला अधिकांश स्थानीयवासी आफ्ना घरमा सुतिरहेका थिए, जसका कारण ठूलो मानवीय क्षति भएको बताइएको छ।
प्रहरीका अनुसार घरबाहिर चार्जिङमा राखिएको इलेक्ट्रिक कारबाट आगलागी सुरु भएको प्रारम्भिक अनुमान गरिएको छ। इन्दौरका पुलिस कमिशनर सन्तोषकुमार सिंहले चार्जिङ प्वाइन्टमा शर्ट सर्किट हुँदा कारमा आगो सल्किएको र केही मिनेटमै आगो घरभित्र फैलिएको जानकारी दिएका छन्।
घरभित्र ठूलो मात्रामा ग्यास सिलिन्डर राखिएको थियो। आगलागीपछि करिब १५ वटा ग्यास सिलिन्डर विस्फोट भएको बताइएको छ। प्रत्यक्षदर्शीका अनुसार तीमध्ये कम्तीमा चार सिलिन्डर लगातार विस्फोट भएका थिए, जसले आगो अझ फैलिन मद्दत गरेको थियो।
घटनापछि दमकल र सुरक्षाकर्मीहरूले आगो नियन्त्रणमा लिएका छन् भने घाइतेहरूको उपचार नजिकैका अस्पतालमा भइरहेको छ। प्रहरीले घटनाबारे विस्तृत अनुसन्धान सुरु गरेको जनाएको छ।
