काठमाडौँ— राष्ट्रिय स्वतन्त्र पार्टी (रास्वपा) ले नवनिर्वाचित सांसदहरूका लागि आयोजना गरेको अभिमुखीकरण कार्यक्रम आज पनि जारी रहेको छ।
ललितपुरस्थित एक होटलमा दुईदिने आवासीय रूपमा सञ्चालन गरिएको उक्त कार्यक्रममा सांसदहरूको काम, कर्तव्य, अधिकार तथा पार्टीका नीति र उद्देश्यबारे जानकारी दिइँदैछ। कार्यक्रम हिजोदेखि सुरु भएको हो र आज सम्पन्न हुने जनाइएको छ।
अभिमुखीकरणमा संसदीय अभ्यास, विधायिकी प्रक्रिया, नीति निर्माण तथा संसदीय समितिहरूको भूमिकालगायतका विषयमा केन्द्रित छलफल भइरहेको छ। साथै, चुनावका बेला नागरिकसँग गरिएका प्रतिबद्धता, आगामी प्राथमिकता र कार्ययोजनाबारे पनि बहस चलिरहेको छ।
कार्यक्रममा संसदीय अभ्यासका जानकार, संविधानविद्, इतिहासविद्, परराष्ट्रविद् तथा अर्थविद्हरूले सहजिकरण गरिरहेका छन्। पार्टीका उपसभापति स्वर्णिम वाग्ले ले ठूलो जनसमर्थनलाई कायम राख्दै नागरिकको भरोसा जोगाउनु आवश्यक रहेकोमा जोड दिएका छन्।
कार्यक्रमको पहिलो दिन पार्टी सभापति रवि लामिछाने र वरिष्ठ नेता बालेन्द्र शाह सहभागी भएका थिएनन्। आज भने दुवै नेता कार्यक्रममा उपस्थित भई सम्बोधन गर्ने रास्वपाले जनाएको छ।
