रसुवा – असार २४ गते तिब्बतबाट आएको भीषण बाढीले रसुवा–चीन नाकाको समग्र संरचना तहसनहस पारेपछि नेपाली भूभागमा पुनःनिर्माणको सुरसार देखिएको छैन। उता, चीनले भने आफ्नोतर्फ धमाधम पुनःनिर्माण कार्य सुरु गरिसकेको छ।
बाढीले नेपाल–चीन जोड्ने मितेरी पुल, टिमुरे भन्सार, जलविद्युत् आयोजना, विद्युतीय चार्जिङ स्टेशन, सडकलगायतका संरचना नष्ट गरेको छ। सयौँ सवारीसाधन बगाउँदा तथा सडक, पुल क्षतिग्रस्त हुँदा रसुवागढी नाका पूर्ण रूपमा अवरुद्ध भएको छ।
सरकारी तथ्यांक अनुसार, हालसम्म ११ जनाको शव फेला परिसकेको छ भने १७ जना अझै बेपत्ता छन्। एक जना घाइते छन्। सुरक्षाकर्मी, सशस्त्र प्रहरी, सेना तथा सिविल टोलीसहित १,९५० जनाको टोली उद्धारमा खटिएको छ। स्थल र हवाईमार्गबाट गरी ९४९ जनाको उद्धार भएको छ।
बाढीले स्याँफ्रुबेसी–टिमुरे सडकखण्डको करिब १.२ किलोमिटर भाग पूर्णरूपमा बगाएको छ। दुईवटा मोटरेबल पुल पूर्णरूपमा नष्ट हुँदा रसुवा–चीनको आवागमन ठप्प भएको छ।
तर, बाढी गएको एक साता बित्न लाग्दा पनि नेपाली पक्षबाट पुनःनिर्माण थालिएको छैन। प्रशासनिक तयारी, सर्वेक्षण वा बजेट व्यवस्थापनको प्रक्रिया समेत सार्वजनिक गरिएको छैन। यता, चीनले भने केरुङतर्फका सडक र संरचनामा जेसीबी, उपकरण र जनशक्ति परिचालन गर्दै पुनःनिर्माण तीव्र बनाएको देखिन्छ।
स्थानीय बासिन्दा र व्यापारीहरूले सरकारसँग पुनःनिर्माणमा शीघ्र पहल गर्न माग गरेका छन्।
