काठमाडौं । लामो समयदेखि बजेट प्रक्रियामा देखिएको गतिरोधपछि काठमाडौं महानगरपालिकाका मेयर बालेन शाहले कार्यपालिका बैठक आह्वान गरेका छन् । बैठक शुक्रबार भोलि दिउँसो २ बजेका लागि बोलाइएको छ ।
कार्यपालिका बैठकअघि बिहान ११ बजे बजेट स्रोत समितिको बैठक बस्नेछ भने त्यसपछि उपमेयर सुनिता डंगोल नेतृत्वको बजेट तथा कार्यक्रम तर्जुमा समितिको बैठक बस्ने कार्यक्रम तय भएको बालेनको सचिवालयले जनाएको छ ।
यी प्रक्रिया पूरा गरेपछि दिउँसो २ बजे कार्यपालिका बैठक बस्नेछ । सो बैठकले आगामी आर्थिक वर्ष २०८२/८३ का लागि नीति, कार्यक्रम तथा बजेट नगरसभामा पेस गर्ने निर्णय गर्नेछ ।
गत वर्ष पनि बजेट प्रक्रिया अलपत्र पर्दा महानगरले समयमै बजेट पास गर्न नसकेको अवस्था दोहोरिन नदिन यसपटक सक्रियता देखाइएको छ ।
