वीरगञ्ज । वीरगञ्जको लिङ्क रोडमा डल्फिन एजुकेसन कन्सल्टेन्सीले आफ्नो १३ औँ शाखा विस्तार गरेको छ ।
उच्च शिक्षाका लागि विदेश जान इच्छुक विद्यार्थीहरूलाई परामर्श र सही शैक्षिक संस्था छनोटमा सहयोग गर्ने उद्देश्यका साथ डल्फिन एजुकेसन कन्सल्टेन्सीले शाखा स्थापना गरिएको शाखा प्रमुख प्रतीक सिंहले बताए ।
शाखा उद्घाटन समारोहमा वीरगञ्ज महानगरपालिकाका प्रमुख राजेशमान सिंहले रिबन काटेर औपचारिक रूपमा शाखाको सुरुवात गरे
उद्घाटन समारोहमा बोल्दै प्रमुख राजेशमान सिंहले दुवै पहलले स्थानीय समुदायलाई ठूलो लाभ पुग्ने बताए । “शिक्षा र स्वास्थ्य दुवै क्षेत्रमा यस्ता पहलहरूले वीरगञ्जको विकासमा महत्त्वपूर्ण योगदान दिनेछ,” उनले भने । डल्फिन एजुकेसन कन्सल्टेन्सी र लिटिल टीथ एन्ड बियोन्ड क्लिनिकको सञ्चालनले वीरगञ्जका बासिन्दाहरूलाई शिक्षा र स्वास्थ्य क्षेत्रमा नयाँ अवसरहरू मिल्ने उनले विश्वास व्यक्त गरे ।
सिंहका अनुसार, वीरगञ्जमा शाखा विस्तार गर्नुको मुख्य कारण स्थानीय विद्यार्थी र अभिभावकहरूलाई कन्सल्टेन्सी सेवाका लागि काठमाडौँ वा अन्य सहरहरू जानुपर्ने बाध्यता हटाउनु हो । “काठमाडौँ जाँदा विद्यार्थी र अभिभावकहरूको समय र अतिरिक्त खर्च हुने गरेको थियो । अब वीरगञ्जमै यो सेवा उपलब्ध भएसँगै त्यो समस्या समाधान हुनेछ,” उनले थपे ।
डल्फिन एजुकेसन कन्सल्टेन्सीले विद्यार्थीहरूलाई शैक्षिक परामर्श, विश्वविद्यालय छनोट, भिसा प्रक्रिया, र अन्य आवश्यक सहयोग प्रदान गर्ने लक्ष्य राखेको छ । शाखाले मधेस प्रदेशका विद्यार्थीहरूलाई उच्च शिक्षाका अवसरहरूबारे जानकारी र सहयोग प्रदान गर्ने अपेक्षा गरिएको छ ।
लिटिल टीथ एन्ड बियोन्ड क्लिनिकको पनि शुभारम्भ
कन्सल्टेन्सीको उद्घाटनसँगै सोही स्थानमा लिटिल टीथ एन्ड बियोन्ड नामक दन्त क्लिनिक पनि सञ्चालनमा आएको छ । क्लिनिक बाल दन्त रोग विशेषज्ञ डा. सुर्बी सिंहको नेतृत्वमा सञ्चालित हुनेछ ।
डा. सिंहले विशेषगरी बालबालिकाको दन्त स्वास्थ्यलाई प्राथमिकता दिँदै मधेस प्रदेशमै पहिलो यस्तो विशेष क्लिनिक सञ्चालनमा ल्याएको दाबी गरेकी छन् । “हाम्रो क्लिनिकले बालबालिकाको दन्त स्वास्थ्यमा विशेष ध्यान दिनेछ ।
साथै, अन्य दन्त सम्बन्धी समस्याहरूको उपचार पनि यहाँ उपलब्ध हुनेछ,” डा. सिंहले भनिन् । उनले क्लिनिकमा आधुनिक प्रविधि र गुणस्तरीय सेवा प्रदान गरिने बताइन् ।
