बीरगन्ज,१८ असार । प्रतिनिधिसभा सदस्य एवं राष्ट्रिय प्रजातन्त्र पार्टीकी नेतृ बिना जयसवाल कुर्मीले वीरगन्ज महानगरपालिकाले सुरु गरेको मुख्य सडक विस्तार अभियानलाई समर्थन गर्दै यसलाई “विकासको अपरिहार्य पाटो” भएको बताएकी छन्।
सामाजिक सञ्जालमार्फत आफ्नो धारणा सार्वजनिक गर्दै सांसद कुर्मीले वीरगन्जको मुख्य सडकको अवस्था अब परिवर्तन हुनुपर्ने उल्लेख गरेकी छन्। “भोलिको लागि आज त्याग गर्नुपर्छ,” भन्दै उनले संकुचित र अव्यवस्थित सडकले वीरगन्जको मात्र होइन, राष्ट्रकै आर्थिक विकासमा अवरोध पु¥याइरहेको बताएकी छन्।
उनका अनुसार वीरगन्ज नेपालको एक प्रमुख व्यापारिक केन्द्र हो र यहाँको पूर्वाधार सुधारले व्यापार, रोजगारी र जीवनशैलीमा ठुलो सुधार ल्याउनेछ। “सडक विस्तार कुनै विकल्प होइन, यो आवश्यकता हो,” भन्दै उनले यसलाई जुनसुकै मूल्यमा सम्पन्न गरिनुपर्ने बताइन्।
कुर्मीले अस्थायी असुविधा स्वीकारेर दीर्घकालीन समाधानतर्फ अघि बढ्नुपर्नेमा जोड दिएकी छन्। “हामीलाई थाहा छ, विकास कार्यहरूले केही अस्थायी असर पार्न सक्छ, तर त्यसले स्थायी समाधान ल्याउनेछ,” उनले लेखेकी छन्।
उनले व्यक्तिगत स्वार्थ र क्षणिक असुविधालाई लिएर विकासमा अवरोध गर्ने सोचप्रणालीलाई स्पष्ट रूपमा चुनौती दिनुपर्ने धारणा राखेकी छन्। “अब निर्णय गर्ने र सहकार्य गर्दै अगाडि बढ्ने समय हो,” भन्दै उनले मुख्य सडक विस्तारलाई राष्ट्रको मेरुदण्ड मजबुत बनाउने आधारको रूपमा चित्रण गरेकी छन्।
सांसद कुर्मीको धारणा वीरगन्जका नागरिकलाई दीर्घकालीन लाभमा सोच्न र विकासको यात्रामा साथ दिन प्रेरित गर्ने सन्देशका रूपमा आएको छ।
