काठमाडौँ । प्रतिनिधिसभाको आजको बैठकमा विभिन्न सांसदहरूले आ–आफ्नो धारणा राखेका छन् । सदनको मर्यादा, सांसद रवि लामिछाने सम्बन्धी मुद्दा र यार्सागुम्बा संरक्षण लगायतका विषयमा सांसदहरूले आ–आफ्नो धारणा राखेका छन् ।
सांसद ज्ञानेन्द्रबहादुर शाहीले सदनमा भइरहेका अवरोधप्रति आपत्ति जनाउँदै भने, ‘संसद् यसरी आन्दोलनका शैलीमा चल्न सक्दैन । यो संसदीय प्रणाली होइन, दादागिरीले सदन चल्न सक्दैन ।’ उनले संसद्लाई मर्यादित रूपमा सञ्चालन गर्नुपर्ने आवश्यकता औँल्याए ।
त्यसैगरी, सांसद नगिना यादवले सदन अस्तव्यस्त देखिएको भन्दै जनताको आवाज सम्बोधन हुन नसकेको गुनासो गरिन् । उनले राष्ट्रिय स्वतन्त्र पार्टीका सभापति रवि लामिछानेविरुद्ध तीन वटा मुद्दा रहेको स्मरण गराउँदै भनिन्, ‘उहाँ जेलमा हुनुहुन्छ । उहाँमाथि विभिन्न काण्डको आरोप छ तर न संसदीय दलबाट राजीनामा दिनुभएको छ, न पार्टीबाट । आफैँ गन्हाइसकेपछि अरूको बारेमा प्रश्न उठाउनु कत्तिको जायज हो ?’
