झापाको बिर्तामोड नगरपालिका–४ मा सञ्चालनमा रहेका दुई उद्योगमा आज बिहान आगलागी हुँदा ठूलो क्षति भएको छ ।
जिल्ला प्रहरी कार्यालय झापाका सूचना अधिकारी खगेन्द्रबहादुर खड्काका अनुसार आगलागीबाट ‘झापाली चिप्स फ्याक्ट्री’ र ‘सौगात काष्ठ फर्निचर उद्योग’मा ठूलो क्षति पुगेको छ ।
बिहान करिब ४:१५ बजे एकैसाथ आगलागी भएको ती दुवै उद्योगमा कच्चा पदार्थ, तयारी सामान र मेसिनरी उपकरण जलेर नष्ट भएका छन् । प्रारम्भिक अनुमानअनुसार करिब एक करोड रुपैयाँ बराबरको क्षति भएको प्रहरीले जनाएको छ ।
आगो नियन्त्रणका लागि इलाका प्रहरी कार्यालय बिर्तामोड, सशस्त्र प्रहरी बेस क्याम्प शनिश्चरे, स्थानीय तहका दमकल तथा स्थानीयवासी परिचालित भएका थिए । केहीबेरको प्रयासपछि आगो नियन्त्रणमा आएको हो ।
आगलागीको कारण खुल्न बाँकी रहेको र घटनाबारे अनुसन्धान भइरहेको प्रहरीले जनाएको छ ।
