बाराको जीतपुरसिमरा उपमहानगरपालिकाले वडा नं. ७ भित्र पर्ने सार्वजनिक तथा गोचर जग्गामा निर्माण गरिएका अवैध संरचना हटाउन सम्बन्धित पक्षलाई सूचना जारी गरेको छ।
उपमहानगरपालिकाको कार्यपालिका कार्यालयद्वारा जारी सूचनामा जीतपुरस्थित पथलैया–वीरगञ्ज ६ लेन सडकको पूर्व–पश्चिम क्षेत्रमा पर्ने साविक जीतपुर भवानीपुर गाविस वडा नं. ३ का विभिन्न कित्तामा अतिक्रमण गरी बनाइएका संरचना हटाउन निर्देशन दिइएको उल्लेख छ।
सूचनाअनुसार, आगामी २०८३ साल बैशाख २ गतेभित्र सबै अवैध संरचना स्वेच्छाले हटाउन आग्रह गरिएको छ। तोकिएको समयसीमाभित्र संरचना नहटाइएमा बैशाख ३ गते बिहान ७ बजेदेखि उपमहानगरपालिकाले आफैं हटाउने चेतावनी दिएको छ।
त्यसक्रममा लाग्ने सम्पूर्ण खर्च स्थानीय सरकार सञ्चालन ऐन, २०७४ को दफा ४५ (४) अनुसार सम्बन्धित व्यक्तिबाट असुल गरिने पनि जनाइएको छ।
प्रशासनिक अधिकृत रामेश्वर बनजाराद्वारा हस्ताक्षरित उक्त सूचनामा सार्वजनिक जग्गाको संरक्षण र व्यवस्थापनलाई प्रभावकारी बनाउन यो कदम चालिएको स्पष्ट पारिएको छ।
