बाराको परवानीपुर गाउँपालिकामा राष्ट्रिय स्वतन्त्र पार्टी (रास्वपा) का नेताकार्यकर्ताहरूले सरसफाइ व्यवस्थापन तथा बढ्दो लामखुट्टे प्रकोप नियन्त्रणको माग गर्दै गाउँपालिका कार्यालयमा ध्यानाकर्षणपत्र बुझाएका छन् ।
रास्वपाका गाउँपालिका सभापति सन्तोषकुमार यादवको नेतृत्वमा मंगलबार गाउँपालिका कार्यालय पुगेका युवा नेताकार्यकर्ताहरूले प्रमुख प्रशासकीय अधिकृतसमक्ष चार बुँदे ध्यानाकर्षणपत्र पेश गरेका हुन् ।
ध्यानाकर्षणपत्रमा गाउँपालिकाका विभिन्न वडा तथा टोलहरूमा सडकमै फोहोर थुप्रिने, नालाहरू समयमै सफा नहुने जस्ता समस्याले वातावरण अस्वस्थ बन्दै गएको उल्लेख गरिएको छ । साथै, लामखुट्टेको अत्यधिक वृद्धि भई सर्वसाधारणको स्वास्थ्यमा गम्भीर जोखिम उत्पन्न भइरहेको भन्दै तत्काल समाधानको माग गरिएको छ ।
यादवका अनुसार प्रत्येक वडामा नियमित फोहोर संकलन तथा व्यवस्थापनको व्यवस्था गर्नुपर्ने, फोहोरले भरिएका नालाहरू तत्काल सफा गर्नुपर्ने, लामखुट्टे नियन्त्रणका लागि विषादी छर्कने व्यवस्था मिलाउनुपर्ने र सरसफाइसम्बन्धी जनचेतनामूलक कार्यक्रम सञ्चालन गर्नुपर्ने माग गरिएको छ ।
स्थानीय तहले समयमै उचित कदम नचाले जनस्वास्थ्यमा थप समस्या निम्तिन सक्ने चेतावनी समेत दिइएको छ ।
