इरान र इजरायलबीच तनाव थप चर्किएको छ। इरानका सेना प्रमुख अमीर हातामी ले इजरायली हवाई हमलामा मारिएका वरिष्ठ अधिकारी अली लारिजानी को हत्याको निर्णायक बदला लिने चेतावनी दिएका छन्।
मंगलबार मृत्यु भएको पुष्टि गरिएका लारिजानी सुप्रिम नेशनल सेक्युरिटी काउन्सिल का सचिव थिए। इरानले उनको मृत्युको पुष्टि गर्नु अघि इजरायलले हवाई आक्रमणमा उनी मारिएको दाबी गरेको थियो।
अमीर हातामीले एक कडा चेतावनी दिँदै ‘सही समय र स्थानमा अपराधी अमेरिका र जियोनिस्ट शासनलाई यस्तो जवाफ दिनेछौं, जसले अरूका लागि पनि पाठ बनोस्’ बताएका छन्। उनले यस आक्रमणलाई ‘अपराध’ भन्दै यसको गम्भीर परिणाम हुने संकेत गरेका छन्।
यसैबीच, इरानको रिभोल्युशनरी गार्ड्स (IRGC) ले लारिजानीको मृत्युको बदला स्वरूप मध्य इजरायलतर्फ मिसाइल प्रहार गरिसकेको दाबी गरेको छ। आईआरजीसी इरानको नियमित सेनाभन्दा अलग्गै शक्तिशाली सैन्य संगठन हो।
घटनापछि मध्यपूर्व क्षेत्रमा सुरक्षा अवस्था थप संवेदनशील बनेको छ भने अन्तर्राष्ट्रिय समुदायले संयमता अपनाउन आह्वान गरिरहेको छ।
