जेठ १६ – संघीय संसद्अन्तर्गत आज चारवटा समितिको बैठक बस्दैछ।
पूर्वाधार विकास, विधायन व्यवस्थापन, संघीयता सबलीकरण तथा राष्ट्रिय सरोकार र संसदीय सुनुवाइ समिति (संयुक्त) बैठक बस्न लागेको हो । पूर्वाधार विकास समितिको बैठकमा विद्युत् विधेयक, २०८० माथि संशोधनसहित दफावार छलफल हुनेछ । बैठक बिहान ११ बजे बस्नेछ।
विधायन व्यवस्थापन समितिको बैठकमा संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) विधेयक, २०७९ माथि दफावार छलफल हुनेछ । बैठक दिउँसो १ बजे बस्नेछ । बिहान ११ बजे बस्ने संघीयता सबलीकरण तथा राष्ट्रिय सरोकार समितिको बैठकमा शान्ति प्रक्रिया, संक्रमणकालीन न्यायका सम्बन्धमा हालसम्म भएका काम कारबाही र सो सम्बन्धमा बेपत्ता पारिएका व्यक्तिको छानबिन आयोग र सत्य निरुपण तथा मेलमिलाप आयोगको भावी कार्ययोजनामा छलफल हुनेछ।
संसदीय सुनुवाइ समिति (संयुक्त)को बैठकमा अनुगमन कार्यक्रम सम्बन्धमा छलफल हुनेछ। बैठक बिहान ११ बजे बस्ने कार्यतालिका रहेको संसद् सचिवालयले जनाएको छ।
