राष्ट्रिय स्वतन्त्र पार्टी (रास्वपा) का युवा नेता दुर्गा प्रकाश द्विवेदीले आफ्नो जन्मदिन सामाजिक सेवामार्फत मनाएका छन्। जन्मदिनको अवसरमा उनले वीरगञ्जस्थित मानवसेवा आश्रममा खाद्यान्न तथा आवश्यक राशन सामग्री वितरण गरेका हुन्।
जन्मदिनमा हुने व्यक्तिगत खर्चलाई सामाजिक सेवामा उपयोग गर्ने उद्देश्यले द्विवेदीले आश्रममा रहेका आश्रितहरूका लागि आवश्यक खाद्यान्न तथा राशन सामग्री सहयोग गरेको जनाइएको छ। उनले सामाजिक उत्तरदायित्वलाई व्यवहारमा उतार्दै आफ्नो विशेष दिनलाई सेवामुखी बनाएका हुन्।
द्विवेदीले गुणस्तरीय शिक्षा, प्रभावकारी स्वास्थ्य सेवा, व्यवस्थित पूर्वाधार र अवसरयुक्त समाज निर्माणलाई आफ्नो सामाजिक दृष्टिकोण तथा प्राथमिकताका रूपमा अघि सारेका छन्।
उनका अनुसार समाज परिवर्तनका लागि केवल राजनीतिक बहस पर्याप्त नभई समुदायका वास्तविक आवश्यकता र समस्यामा प्रत्यक्ष रूपमा जोडिन आवश्यक छ। त्यसका लागि आफ्नो क्षमता, समय र ऊर्जालाई समाजको उत्थानमा निरन्तर प्रयोग गर्ने प्रतिबद्धता उनले व्यक्त गरेका छन्।
मानवसेवा आश्रमले सडक आश्रित, बेसहारा तथा सहयोगको आवश्यकता भएका व्यक्तिहरूको संरक्षण तथा सेवामा काम गर्दै आएको छ। आश्रममा खाद्यान्न तथा राशन सामग्री सहयोगले दैनिक आवश्यकतामा केही राहत पुग्ने अपेक्षा गरिएको छ।
द्विवेदीले आगामी दिनमा पनि शिक्षा, स्वास्थ्य, सामाजिक सेवा तथा समुदायको विकाससँग जोडिएका गतिविधिलाई प्राथमिकता दिने बताएका छन्। जन्मदिनलाई मनोरञ्जन र व्यक्तिगत उत्सवमा मात्र सीमित नराखी सामाजिक सेवासँग जोड्ने प्रयासले युवाहरूलाई पनि सामाजिक उत्तरदायित्वप्रति प्रेरित गर्ने उनको विश्वास छ।
