नेपाल राष्ट्र बैंकले ३५ अर्ब रुपैयाँ बराबरको ऋणपत्र २०८४ ‘क’ को बिक्रीका लागि बोलकबोल आह्वान गरेको छ ।
राष्ट्र बैंकको मौद्रिक व्यवस्थापन विभागले मंगलबार सूचना जारी गर्दै उक्त ऋणपत्रका लागि अनलाइन प्रणालीमार्फत बोलकबोल गर्न सकिने जनाएको हो । सूचनाअनुसार नेपाल राष्ट्र बैंकबाट इजाजत प्राप्त ‘क’, ‘ख’ र ‘ग’ वर्गका बैंक तथा वित्तीय संस्था (काउन्टरपार्टी) मात्र बोलकबोल प्रक्रियामा सहभागी हुन सक्नेछन् ।
बोलकबोल गर्ने काउन्टरपार्टीले आफूले खरिद गर्न चाहेको रकम र प्रस्तावित ब्याजदर (दशमलवपछि चार अंकसम्म) उल्लेख गर्नुपर्ने व्यवस्था गरिएको छ । राष्ट्र बैंकका अनुसार न्यूनतम पाँच करोड रुपैयाँदेखि अधिकतम आह्वान गरिएको कुल ३५ अर्ब रुपैयाँसम्म बोलकबोल गर्न सकिनेछ ।
बोलकबोल रकम पाँच करोड रुपैयाँले भाग गर्दा निःशेष भाग जाने गरी प्रस्ताव गर्नुपर्ने व्यवस्था गरिएको छ ।
