मधेस प्रदेशको धार्मिक तथा ऐतिहासिक नगरी जनकपुरधाममा नयाँ वर्ष २०८३ को अवसरमा श्रद्धालु भक्तजनहरूको उल्लेखनीय भीड लागेको छ ।
नयाँ वर्षको पहिलो दिन नेपाल तथा भारत का विभिन्न स्थानबाट आएका भक्तजनहरूले जनकपुरधामका मठमन्दिरहरूमा दर्शन गरेका छन् । नेपाली समाजमा नववर्षको अवसरमा नयाँ योजना तथा सङ्कल्प गर्ने परम्परा रहेको छ ।
वर्षको पहिलो दिन भगवानसँग मनोकामना पूरा होस् भन्ने कामनासहित मठमन्दिर जाने चलनअनुसार जनकपुरधाममा पनि बिहानैदेखि भक्तजनहरूको घुइँचो लागेको थियो । विशेषगरी जानकी मन्दिर लगायतका प्रमुख धार्मिक स्थलहरूमा दर्शन तथा पूजाआजाका लागि हजारौँ भक्तजन पुगेका छन् ।
भक्तजनहरूले वर्षको पहिलो दिन भगवानको दर्शन गरी सुख, शान्ति र समृद्धिको कामना गरेका छन् । नयाँ वर्षमा धार्मिक स्थलमा दर्शन गर्ने परम्पराले धार्मिक पर्यटन प्रवर्द्धनमा समेत टेवा पुर्याएको छ ।
माता सीताको जन्मस्थलका रूपमा परिचित जनकपुरधाममा नयाँ वर्ष, रामनवमी तथा विवाह पञ्चमीजस्ता पर्वहरूमा पर्यटक आगमन उल्लेखनीय रूपमा बढ्ने गर्दछ । यस वर्ष पनि होटल, धर्मशाला तथा यातायात क्षेत्रमा चाप बढेको स्थानीय व्यवसायीहरूले बताएका छन्। उनीहरूका अनुसार बढ्दो पर्यटक आगमनले स्थानीय आर्थिक गतिविधि चलायमान बनेको छ ।
स्थानीय व्यवसायी जितेन्द्र कुमार साहले नयाँ वर्षसँगै देशमा सकारात्मक परिवर्तन आउने अपेक्षा व्यक्त गर्नुभयो । उहाँले हालै गठन भएको नयाँ सरकारबाट जनताको आर्थिक अवस्था सुधार, रोजगारी सिर्जना तथा स्वास्थ्य र शिक्षामा गुणस्तर वृद्धि हुने विश्वास व्यक्त गर्नुभयो ।
त्यसैगरी, जनकपुरधाममा दर्शन गर्न आउने भक्तजन तथा पर्यटकहरूको सुरक्षा, मन्दिरको सरसफाइ र व्यवस्थापनमा स्थानीय प्रशासनले विशेष ध्यान दिएको जनाएको छ ।
