ग्रीस ले सन् २०२७ को जनवरी १ देखि १५ वर्षमुनिका बालबालिकालाई सामाजिक सञ्जाल प्रयोगमा प्रतिबन्ध लगाउने तयारी गरेको छ। प्रधानमन्त्री किरियाकोस मित्सोटाकिस ले उक्त निर्णयको उद्देश्य बालबालिकामा बढ्दो चिन्ता, निद्रा समस्या र स्क्रिन लतलाई नियन्त्रण गर्नु रहेको बताएका छन्।
अन्तर्राष्ट्रिय समाचार संस्था रोयटर्स का अनुसार, गएको फेब्रुअरीमा गरिएको एक मत सर्वेक्षणमा करिब ८० प्रतिशत सहभागीहरूले यस्तो प्रतिबन्धको समर्थन गरेका छन्।
ग्रीक सरकारले यसअघि नै विद्यालयहरूमा मोबाइल फोन प्रयोगलाई गैरकानूनी घोषणा गरिसकेको छ। साथै, किशोरकिशोरीहरूको स्क्रिन समय सीमित गर्न अभिभावकीय नियन्त्रण प्लेटफर्महरू समेत कार्यान्वयनमा ल्याइएको छ।
यस सम्बन्धी कानून २०२६ को मध्यतिर ग्रीसको संसद् बाट पारित गरिने अपेक्षा गरिएको छ।
यसबीच, बेलायत, मलेशिया, फ्रान्स, डेनमार्क र पोल्यान्ड लगायतका देशहरूले पनि सामाजिक सञ्जालसम्बन्धी नियमहरू कडा बनाउने दिशामा काम गरिरहेका छन्।
यसअघि गएको डिसेम्बरमा अस्ट्रेलिया ले १६ वर्षमुनिका बालबालिकाका लागि सामाजिक सञ्जालमा प्रतिबन्ध लागू गर्दै यस्तो कदम चाल्ने विश्वकै पहिलो देश बनेको थियो।
