काठमाडौं — आइतबार एकैदिन सुनको भाउ उल्लेखनीय रूपमा घटेको छ। नेपाल सुनचाँदी व्यवसायी महासंघका अनुसार यस दिन सुनको मूल्य प्रतितोला १२ हजार ५ सय रुपैयाँले घटेर २ लाख ८२ हजार रुपैयाँ कायम भएको छ।
अघिल्लो दिन सुन प्रतितोला २ लाख ९४ हजार ५ सय रुपैयाँमा कारोबार भएको थियो। पछिल्लो एक साताको अवधिमा मात्रै सुनको भाउ २७ हजार ४ सय रुपैयाँले घटिसकेको छ। गत आइतबार सुन प्रतितोला ३ लाख ९ हजार ४ सय रुपैयाँमा कारोबार भएको थियो।
यसअघि गत माघ १५ गते सुनको भाउ हालसम्मकै उच्च बिन्दुमा पुग्दै प्रतितोला ३ लाख ३९ हजार ३ सय रुपैयाँ पुगेको रेकर्ड कायम भएको थियो।
अन्तर्राष्ट्रिय बजारमा तेलको मूल्य वृद्धि भएसँगै अमेरिकी डलरको माग बढ्नु र ब्याजदरमा दबाब सिर्जना हुनुका कारण सुनको मूल्यमा गिरावट आएको अन्तर्राष्ट्रिय सञ्चार माध्यमहरूले जनाएका छन्। सुन बिक्रीमार्फत डलर संकलन बढ्नुले पनि मूल्य घट्न सहयोग पुगेको बताइएको छ।
यसैबीच, चाँदीको भाउ पनि घटेको छ। आइतबार चाँदी प्रतितोला ३५५ रुपैयाँले घटेर ४ हजार ५४० रुपैयाँमा झरेको छ। अघिल्लो दिन चाँदी ४ हजार ८९५ रुपैयाँमा कारोबार भएको थियो।
एक सातामा चाँदीको मूल्य प्रतितोला ७३० रुपैयाँले घटेको छ। गत आइतबार चाँदी ५ हजार २७० रुपैयाँमा कारोबार भएको थियो भने माघ १५ गते हालसम्मकै उच्च मूल्य ७ हजार ५०५ रुपैयाँ पुगेको थियो।
