काठमाडौं — प्रतिनिधिसभामा सीमान्तकृत समुदायको उपस्थिति अपेक्षाकृत रूपमा कमजोर देखिएको छ।
प्रतिनिधिसभा सदस्य निर्वाचनको प्रत्यक्षतर्फ १६५ सिटमध्ये जम्मा १४ जना अर्थात् ८.४८ प्रतिशत मात्रै सीमान्तकृत समुदायका उम्मेदवार निर्वाचित भएका छन्।
तथ्याङ्कअनुसार आदिवासी जनजाति समुदायबाट २६ जना (१५.७६ प्रतिशत), मधेशी समुदायबाट २८ जना (१६.९७ प्रतिशत), थारू समुदायबाट पाँच जना (३.०३ प्रतिशत), मुस्लिम समुदायबाट चार जना (२.४२ प्रतिशत) र दलित समुदायबाट मात्र एक जना (०.६१ प्रतिशत) निर्वाचित भएका छन्।
सीमान्तकृत समुदायभित्र पनि करिब १३.४ प्रतिशत जनसङ्ख्या रहेको दलित समुदायको प्रतिनिधित्व अत्यन्त न्यून देखिएको छ।
समानुपातिक प्रणालीतर्फ दलहरूले प्राप्त गरेको मतका आधारमा दलित क्लस्टरबाट राष्ट्रिय स्वतन्त्र पार्टीबाट सात महिला र दुई पुरुष गरी नौ जना प्रतिनिधिसभामा आउने देखिन्छ। त्यस्तै नेपाली कांग्रेसबाट दुई महिला र एक पुरुष, नेकपा (एमाले) बाट एक महिला तथा नेकपाबाट एक महिला गरी जम्मा १४ जना दलित प्रतिनिधि संसद्मा आउने अनुमान गरिएको छ।
यो सङ्ख्या प्रतिनिधिसभाको कुल सदस्य सङ्ख्याको झन्डै पाँच प्रतिशत मात्रै हो। अघिल्लो संसद् र संविधानसभाको तथ्याङ्क हेर्दा दलित समुदायको प्रतिनिधित्व क्रमशः घट्दै गएको देखिएको छ।
