विरगंज – संघीय संसदअन्तर्गत आज दुईवटा संसदीय समितिको बैठक बस्ने भएका छन् । प्रतिनिधिसभाको राज्य व्यवस्था तथा सुशासन समिति र राष्ट्रिय सभाको विधायन व्यवस्थापन समितिको छुट्टाछुट्टै बैठक आज हुनेछन् ।
राज्य व्यवस्था तथा सुशासन समितिको बैठक बिहान ११ बजेका लागि बोलाइएको छ । बैठकमा “नेपाल नागरिकता ऐन, २०६३” लाई संशोधन गर्न बनेको विधेयकमाथि विस्तृत छलफल हुने कार्यसूची तय गरिएको छ। यो विधेयक विगत केही समयदेखि विवादको केन्द्रमा रहँदै आएको छ ।
यसैगरी, राष्ट्रिय सभाको विधायन व्यवस्थापन समितिको बैठक दिउँसो १ बजे बस्नेछ । उक्त बैठकमा “केही नेपाल ऐनलाई संशोधन गर्ने विधेयक, २०८०” माथि दफावार छलफल हुने कार्यतालिका तय गरिएको छ ।
दुवै समितिका बैठकहरू महत्वपूर्ण विधेयकहरूबारे छलफल गर्न लागिएकाले सांसद, कानुनविद् तथा सार्वजनिक चासो राख्ने पक्षको ध्यान आकर्षित भएको छ । संसदमा दर्ता भएका यी विधेयकहरू मुलुकको कानुनी संरचना तथा नागरिक अधिकारसँग प्रत्यक्ष सम्बन्धित भएकाले तिनको निर्णयप्रति आम जनताको चासो बढ्दो छ ।
