अनुप यादब – १३ असोज,वीरगञ्ज । जिल्ला बचत तथा ऋण सहकारी संघ लि. पर्साको आयोजनामा सहकारी क्षेत्रमा देखिएका विभिन्न समस्या तथा ऐन, नियमावली, नीति र नियमका विषयमा छलफल कार्यक्रम सम्पन्न भएको छ।
संघका अध्यक्ष हरेराम प्रसादको अध्यक्षतामा सम्पन्न कार्यक्रममा मधेश प्रदेश सरकार, भूमि व्यवस्था, कृषि तथा सहकारी मन्त्रालयअन्तर्गत प्रदेश सहकारी रजिष्ट्रार कार्यालयका रजिष्ट्रार रुपेश साह प्रमुख अतिथिका रूपमा सहभागी थिए। कार्यक्रममा सोही कार्यालयका रामनारायण यादव र बासुदेव भट अतिथिका रूपमा उपस्थित थिए।
कार्यक्रममा जिल्ला बचत संघका वरिष्ठ उपाध्यक्ष जिष्णु बराल, उपाध्यक्ष नंगनारायण सिंह, सचिव नरेश कुमार चौरसिया, सदस्यहरू मनु पटेल, धर्मनाथ कुश्वाहा र हृदयनारायण साहलगायत विभिन्न सहकारी संस्थाका प्रतिनिधिहरूको सहभागिता रहेको थियो।
त्यसैगरी सुनौले साकोसका अध्यक्ष सुरेश महतो कोईरी, सनराइज नेपाल साकोसका अध्यक्ष दिपक राज भण्डारी, गंगन साकोसका अध्यक्ष राजेश राय यादव, महालक्ष्मी साकोसका प्रबन्धक जितेन्द्र बर्मा र श्री गणेश साकोसका प्रबन्धक कलिमुल्लाह अंसारी लगायतको उपस्थिति रहेको थियो।
कार्यक्रममा सहकारी क्षेत्रमा देखिएका समस्या, त्यसको समाधानका उपाय तथा सम्बन्धित मन्त्रालय र नियामक निकायसँग आवश्यक समन्वय तथा पहल गर्ने विषयमा छलफल गरिएको थियो। सहभागीहरूले सहकारी संस्थाका व्यावहारिक समस्या, कानुनी तथा नीतिगत विषय र संस्थागत सुधारका विषयमा आफ्ना धारणा राखेका थिए।
छलफलपछि सहकारी क्षेत्रका समस्या समाधानका लागि प्रदेश सहकारी रजिष्ट्रार कार्यालयबाट आवश्यक समन्वय तथा पहल गर्ने प्रतिबद्धता व्यक्त गरिएको आयोजकले जनाएको छ।
कार्यक्रमको सञ्चालन जिल्ला बचत तथा ऋण सहकारी संघ लि. पर्साका सचिव नरेश कुमार चौरसियाले गरेका थिए। सहकारी क्षेत्रका समसामयिक विषयमा सरोकारवालाबीच प्रत्यक्ष छलफल र समन्वयलाई निरन्तरता दिने उद्देश्यले कार्यक्रम आयोजना गरिएको संघले जनाएको छ।
