लालबाबु सिंह, २५ भदौ, वीरगञ्ज । नेपाल सीएमए संघको २३औं वार्षिकोत्सवको अवसरमा नेपाल सीएमए संघ पर्सा द्वारा वीरगञ्ज घण्टाघरमा रक्तदान कार्यक्रम आयोजना गरिएको थियो।
कार्यक्रममा १ जना महिला सहित कुल *२८ जना रक्तवीर*हरूले रक्तदान गरे।
रक्तदान गर्नेहरूमा रेनु गुप्ता, डा. हरिकान्त साह, राजेश यादव, आबिद हुसेन, कुन्दन गुप्ता, रेयाज हुसेन, सफुल्लाह अन्सारी, विश्वनाथ साह, अमरलाल साह सोनार, पलट चौधरी सहित जम्मा २८ जना थिए। उनीहरूले आफ्नो अमूल्य रगत दान गरेर मानवता मजबुत बनाएका थिए।
कार्यक्रम *नेपाल सीएमए संघ पर्साका अध्यक्ष जितेन्द्र महतो*को अध्यक्षता, *नारायणी अस्पतालका मेसु डा. चितरञ्जन साह*को प्रमुख आतिथ्यमा सम्पन्न भएको थियो।
त्यस्तै कार्यक्रममा नेपाल सीएमए संघका केन्द्रीय अध्यक्ष रामेश्वर प्रसाद, नारायणी अस्पतालका वरिष्ठ चिकित्सक डा. निरज सिंह, नेपाल रेडक्रस सोसाइटी पर्साका सभापति वृजकिशोर प्रसाद पटेल, पर्साका सहायक प्रमुख जिल्ला अधिकारी कृष्ण थापा लगायत संघका पदाधिकारी, सदस्यहरू, स्थानीय समाजसेवी, अग्रज, महिला र युवाहरूको सहभागिता रहेको थियो।
संघका केन्द्रीय अध्यक्ष *रामेश्वर प्रसाद*ले रक्तदानले प्रत्यक्ष रूपमा मानिसहरूको ज्यान बचाउन मद्दत गर्ने बताए। उनले स्वास्थ्य कर्मीहरूको संस्था सीएमए संघले रक्तदान, स्वास्थ्य शिविर लगायतका कार्यक्रम आयोजना गरी सामाजिक सेवामा सक्रिय भूमिका खेल्नुपर्ने र त्यसबाट आपसी एकता र मानवता बलियो हुने बताए।
आयोजक संघ पर्साका अध्यक्ष *जितेन्द्र महतो*ले रक्तदान नै जीवनदान भएको बताए। उनले संघले प्रत्येक वार्षिकोत्सवमा रक्तदान कार्यक्रमसँगै अन्य कार्यक्रममार्फत सामाजिक उत्तरदायित्वसँग जोडिएको महत्वपूर्ण मानवीय सेवा दायित्व पूरा गर्दै आएको र यस्ता कार्यक्रमलाई निरन्तरता दिइने प्रतिबद्धता व्यक्त गरे।
यस अवसरमा सहभागी अतिथिहरूले आफ्नो शरीरको अमूल्य रगत दान गरी कसैको ज्यान बचाउन योगदान गर्ने रक्तवीरहरूको मुक्तकण्ठले प्रशंसा गर्दै आभार व्यक्त गरे र संघको वार्षिकोत्सवको अवसरमा सबैलाई बधाई तथा शुभकामना व्यक्त गरे।
