नेपालमा पेट्रोलियम पदार्थको मूल्य फेरि बढाइएको छ। नेपाल आयल निगम ले अन्तर्राष्ट्रिय बजारमा मूल्य वृद्धि र बढ्दो घाटालाई कारण देखाउँदै नयाँ मूल्य समायोजन गरेको हो।
नयाँ दर अनुसार पेट्रोलमा प्रति लिटर १७ रुपैयाँ र डिजेल/मट्टितेलमा २५ रुपैयाँ वृद्धि गरिएको छ। यससँगै पेट्रोलको मूल्य विभिन्न क्षेत्रमा २१६.५० देखि २१९ रुपैयाँसम्म पुगेको छ भने डिजेल/मट्टितेलको मूल्य २०४.५० देखि २०७ रुपैयाँसम्म कायम गरिएको निगमले जनाएको छ।
निगमका अनुसार, भन्सार महसुल र पूर्वाधार विकास कर समायोजनपछि पनि ठूलो घाटा कायमै रहेको छ। हाल पेट्रोलमा प्रति लिटर १६.६५ रुपैयाँ, डिजेलमा १०९.५० रुपैयाँ र एलपी ग्यासमा प्रति सिलिण्डर ४१६.३७ रुपैयाँ घाटा रहेको छ। यस हिसाबले निगमलाई प्रत्येक पन्ध्र दिनमा करिब १० अर्ब २१ करोड ९१ लाख रुपैयाँ घाटा हुने अनुमान गरिएको छ।
निगमले निरन्तर घाटा भइरहेमा इण्डियन आयल कर्पोरेशन लाई भुक्तानी गर्न समस्या आउन सक्ने र आपूर्ति व्यवस्थापनमा असर पर्ने चेतावनी दिएको छ। यही कारणले पूर्ण लागत अनुसार मूल्य वृद्धि नगरी आंशिक रूपमा समायोजन गरिएको जनाएको छ।
यससँगै एलपी ग्यासमा प्रति सिलिण्डर १०० रुपैयाँ वृद्धि गरिएको छ। अब १४.२ केजी ग्यासको मूल्य २०१० रुपैयाँ पुगेको छ। हवाई इन्धन (आन्तरिक) मा पनि प्रति लिटर ६ रुपैयाँ वृद्धि गरिएको निगमले जनाएको छ।
निगमले दीर्घकालीन रूपमा मूल्य स्थिरता कायम गर्न अझै चुनौतीपूर्ण अवस्था रहेको पनि स्पष्ट पारेको छ।
