केपी शर्मा ओली पक्राउ परेलगत्तै स्वास्थ्य परीक्षणका लागि त्रिवि शिक्षण अस्पताल (टिचिङ अस्पताल) भर्ना भएका छन्।
प्रहरीले शनिबार बिहान भक्तपुरस्थित निवासबाट पक्राउ गरेपछि उनलाई प्रारम्भिक स्वास्थ्य जाँचका लागि अस्पताल लगिएको थियो। सुरुमा ‘रेड एरिया’को २७ नम्बर बेडमा राखेर परीक्षण गरिएको थियो। त्यसक्रममा नेफ्रोलोजी विशेषज्ञ डा. रविन नेपालीसहितको टोलीले स्वास्थ्य अवस्था जाँच गरेको थियो भने मुटु रोग विशेषज्ञहरूले पनि परीक्षण गरेका थिए।
रगत परीक्षण, भिडियो एक्स–रे लगायत विभिन्न जाँचपछि उनलाई ‘एनेक्स वान’ भवनको ५०१ नम्बर बेडमा सारिएको अस्पताल स्रोतले जनाएको छ। सो बेड सामान्यतया मिर्गौला प्रत्यारोपण गरेका बिरामीका लागि प्रयोग हुने गर्दछ। ओली यसअघि दुई पटक मिर्गौला प्रत्यारोपण गराइसकेका बिरामी हुन्।
ओलीलाई अस्पतालको उक्त भवनसम्म लैजाँदा उनकै सवारी साधन प्रयोग गरिएको थियो। हाल उनको स्वास्थ्य अवस्था चिकित्सकको निगरानीमा रहेको बताइएको छ।
यसैबीच, ‘जेनजी आन्दोलन’ दमनसँग सम्बन्धित फौजदारी आरोपमा कारबाही सिफारिस भएपछि उनलाई पक्राउ गरिएको जनाइएको छ। सोही प्रकरणमा तत्कालीन गृहमन्त्री रमेश लेखक पनि पक्राउ परेका छन्।
शनिबार सार्वजनिक बिदा परेकाले दुवै जनालाई आइतबार अदालतमा उपस्थित गराउने तयारी भइरहेको प्रहरीले जनाएको छ।
