बारा जिल्लाको समग्र आर्थिक विकास र सीमावर्ती व्यापारको व्यवस्थित विस्तारलाई केन्द्रमा राख्दै आम जनता पार्टीका बारा निर्वाचन क्षेत्र नं. १ का प्रतिनिधिसभा सदस्य उम्मेदवार विजय यादव निर्विजले भन्सार कार्यालय स्थापना आफ्नो प्रमुख चुनावी प्रतिबद्धता भएको स्पष्ट पारेका छन्।
घरदैलो तथा मतदाता भेटघाट कार्यक्रम अन्तर्गत सिम्रौनगढ नगरपालिकाका विभिन्न वडामा आयोजित सभालाई सम्बोधन गर्दै उनले सीमावर्ती क्षेत्रको आर्थिक सम्भावनालाई मूर्त रूप दिन स्थानीय तहमै भन्सार कार्यालय स्थापना अपरिहार्य रहेको बताए। वडा नं. १ ननसगरा ढाट र बोर्डर बैरिया, वडा नं. २ नयका टोल, अमृतगञ्ज वडा नं. ३ जोलाही, वडा नं. ४ हरियरपुर तथा गंगानगर क्षेत्रमा आयोजित कार्यक्रममा उनले यो मुद्दालाई जोडदार रूपमा उठाएका हुन्।
यादवले बारा–१ क्षेत्रमा कृषि उत्पादन, साना तथा मझौला उद्योग र सीमावर्ती व्यापारको उल्लेखनीय सम्भावना हुँदाहुँदै पनि भन्सार संरचनाको अभावले स्थानीय व्यवसायीलाई अन्य जिल्लामा धाउनुपर्ने बाध्यता रहेको बताए। यसका कारण ढुवानी खर्च वृद्धि, समयको क्षति तथा प्रशासनिक झन्झट थपिएको उनको भनाइ छ। “स्थानीय स्तरमै भन्सार कार्यालय स्थापना भए व्यापारिक गतिविधि तीव्र हुन्छ, राजस्व संकलन बढ्छ र बाराको अर्थतन्त्र चलायमान बन्छ,” उनले उल्लेख गरे।
उनले भन्सार कार्यालय स्थापना भएपछि अवैध आयात–निर्यात नियन्त्रणमा आउने, राजस्व चुहावट न्यूनीकरण हुने र सीमावर्ती बजार पारदर्शी तथा व्यवस्थित बन्ने विश्वास व्यक्त गरे। साथै यसबाट स्थानीय युवाहरूका लागि रोजगारी सिर्जना हुनुका साथै उद्यमशीलतामा समेत टेवा पुग्ने उनले बताए।
यादवले भन्सार स्थापना केवल राजनीतिक मुद्दा नभई बाराको दीर्घकालीन समृद्धिसँग जोडिएको रणनीतिक आवश्यकता भएको उल्लेख गरे। “हामी जनताको मागलाई केन्द्रमा राखेर संघीय सरकार र सम्बन्धित मन्त्रालयसँग प्रभावकारी पहल गर्छौं,” उनले प्रतिबद्धता जनाए।
उनको यो एजेन्डाले बारा क्षेत्रमा आर्थिक विकाससम्बन्धी बहसलाई नयाँ आयाम दिएको छ। स्थानीय उद्योगी–व्यवसायी र सर्वसाधारणले अब भन्सार कार्यालय स्थापनाका लागि ठोस निर्णय र कार्यान्वयनको अपेक्षा गरेका छन्।
