काठमाडौं— मकवानपुर जिल्लाको मनहरी गाउँपालिका–९ रजैयास्थित पूर्व–पश्चिम सडकखण्डमा चामल लोड गरिएको ट्रक र यात्रुबाहक बस एकआपसमा ठोक्किँदा १४ जना घाइते भएका छन्।
प्रहरीका अनुसार बा.प्र ०६–००१ ख ०४१५ नम्बरको चामल बोकेको ट्रक हेटौंडातर्फ जाँदै गरेको बेला विपरीत दिशाबाट आउँदै गरेको बा.प्र १–०१–००१ ख ४७६८ नम्बरको बससँग राति करिब ११:४० बजे ठोक्किएको हो।
दुर्घटनापछि मनहरीबाट खटिएको प्रहरी टोलीले घाइतेहरूको उद्धार गरी उपचारका लागि हेटौंडा पठाएको जनाएको छ। हाल सबै घाइतेको चुरे हिल अस्पतालमा उपचार भइरहेको प्रहरीले जानकारी दिएको छ।
दुर्घटनाको कारण खुल्न बाँकी रहेको र घटनाबारे थप अनुसन्धान भइरहेको जिल्ला प्रहरीले जनाएको छ।
