वीरगञ्ज । स्थानीय तह निर्वाचन २०७९ मा वीरगञ्ज महानगरपालिका–१८ को वडाध्यक्ष पदमा स्वतन्त्र उम्मेदवारी दिएका नरेश प्रसाद यादव नेपाल कम्युनिस्ट पार्टी (एमाले) मा प्रवेश गरेका छन्।
उक्त निर्वाचनमा उनले ४ सय ४ मत प्राप्त गर्दै स्थानीय तहमा उल्लेख्य लोकप्रियता हासिल गरेका थिए। नवप्रवेशी यादवलाई पार्टीका नेताकार्यकर्ताले फूलमाला, टीका र खादा ओढाएर भव्य स्वागत गरेका थिए।
पार्टी प्रवेश कार्यक्रममा प्रदीप यादव ले नरेश यादवको आगमनले वीरगञ्ज–१८ मा एमालेको जनाधार थप सुदृढ हुने दाबी गरे। “चुनावमा सम्मानजनक मत ल्याउनु भएका इमानदार र लोकप्रिय व्यक्तित्वको पार्टी प्रवेशले हाम्रो संगठन अझ मजबुत भएको छ। उहाँको योगदान वडाको विकास, जनताको सेवा र पार्टी विस्तारमा महत्त्वपूर्ण हुनेछ,” उनले भने।
नरेश प्रसाद यादवले एमाले प्रवेशपछि आफूलाई नयाँ ऊर्जा प्राप्त भएको उल्लेख गर्दै वीरगञ्जको समग्र विकास र स्थानीय जनताको सेवामा अझ प्रभावकारी ढंगले काम गर्ने प्रतिबद्धता जनाए। “एमालेको सिद्धान्त र नीतिसँग म सहमत छु। अब विकास र सेवाका काममा सक्रिय भूमिका खेल्नेछु,” उनले बताए।
उनको प्रवेशसँगै वीरगञ्ज–१८ मा एमालेको संगठनात्मक गतिविधि थप सक्रिय हुने अपेक्षा गरिएको छ।
