१४ जेठ,काठमाडौं । भिजिट भिसा प्रकरणमा नाम जोडिएपछि नैतिक संकटमा परेका गृहमन्त्री रमेश लेखक नेपाली कांग्रेसका सभापति शेरबहादुर देउवालाई साथमा लिएर प्रधानमन्त्री केपी शर्मा ओलीसँग छलफलका लागि बालुवाटार पुगेका छन्।
प्रमुख प्रतिपक्षी दललगायत अन्य विपक्षी दलहरूले गृहमन्त्रीको राजीनामा माग गर्दै संसद अवरुद्ध गरेपछि यस विषयमा समाधान खोज्न देउवा र लेखक प्रधानमन्त्री निवास पुगेका हुन्। मंगलबारको संसद बैठकमा विपक्षी दलहरूले गृहमन्त्रीको राजीनामाको माग गर्दै संसद कार्य अगाडि बढ्न दिएका थिएनन्।
उनीहरूले गृहमन्त्रीको राजीनामा नआएसम्म संसदको गतिरोध जारी राख्ने चेतावनी दिएका छन्। आज पनि संसद बैठक बस्दैछ, तर प्रतिपक्षी दलहरूले अवरोध जारी राख्ने सम्भावना छ। सरकारले बिहीबार बजेट सार्वजनिक गर्ने तयारीमा छ, जुन संवैधानिक बाध्यता पनि हो। बिहीबार बजेट ल्याउनै पर्ने भएकाले सरकारले प्रतिपक्षी दलहरूलाई कसरी विश्वासमा लिएर संसद सञ्चालन गर्ने भन्ने विषयमा प्रधानमन्त्रीसँग छलफल हुने बताइएको छ।
