अनुप यादव, वीरगंज — माईस्थान बिधापीठ माध्यमिक विद्यालय, वीरगंजमा कक्षा १२ का विद्यार्थीहरूको विदाई तथा कक्षा ११ का नयाँ विद्यार्थीहरूको स्वागत कार्यक्रम भव्य रूपमा सम्पन्न भएको छ।
विद्यालय परिसरमा आयोजित उक्त समारोहमा विद्यालय व्यवस्थापन समिति, प्रधानाध्यापक मुनिलाल कर्ण, शिक्षकहरू जयप्रकाश सर्राफ, अमोद गिरी, कनैया सर्राफ, सुसिल ठाकुर, उमेश कुश्वाहा, मनोज बर्णवाल तथा शिक्षिकाहरू करुणा दत्त र अरुणा आनन्द, अभिभावक एवं विद्यार्थीहरूको उल्लेखनीय उपस्थिति रहेको थियो।
कार्यक्रम विभिन्न सांस्कृतिक प्रस्तुति, नृत्य, गीत तथा मनोरञ्जनात्मक गतिविधिहरूसहित उत्साहपूर्ण वातावरणमा सम्पन्न भएको थियो। विद्यार्थीहरूले आफ्ना प्रतिभा प्रस्तुत गर्दै उपस्थित सबैको मन जितेका थिए।
कार्यक्रमका प्रमुख अतिथिले कक्षा १२ का विद्यार्थीहरूलाई आगामी शैक्षिक तथा व्यावसायिक यात्राका लागि शुभकामना व्यक्त गर्दै अनुशासन, मेहनत र लगनशीलतालाई सफलताको आधार बनाउन सुझाव दिनुभयो। साथै, कक्षा ११ मा भर्ना भएका विद्यार्थीहरूलाई विद्यालयका नियमहरूको पालना गर्दै उत्कृष्ट शैक्षिक उपलब्धि हासिल गर्न प्रेरित गरिएको थियो।
विदाई लिने विद्यार्थीहरूले विद्यालयमा बिताएका अविस्मरणीय क्षणहरूको स्मरण गर्दै शिक्षक तथा विद्यालय परिवारप्रति कृतज्ञता व्यक्त गरेका थिए भने स्वागत गरिएका विद्यार्थीहरूले नयाँ वातावरणमा अध्ययन गर्न पाउँदा खुशी व्यक्त गरेका थिए।
समारोहले विद्यार्थीहरूबीच आपसी सम्बन्ध अझ सुदृढ बनाउनका साथै सकारात्मक शैक्षिक वातावरण निर्माणमा महत्वपूर्ण योगदान पुर्याएको विद्यालय प्रशासनले जनाएको छ।
