काठमाडौं– नेपाली कांग्रेसका नेता अर्जुननरसिंह केसीले पार्टीको प्रतिनिधिसभा संसदीय दलको नेतामा दाबी गर्ने भएका छन्।
फागुन २१ गते सम्पन्न प्रतिनिधिसभा निर्वाचनमा समानुपातिक प्रणालीतर्फबाट सांसद बनेका केसीले संसदीय दलको नेतामा आफूले दाबी राख्ने बताएका हुन्।
पार्टी केन्द्रीय कार्यालय सानेपामा शुक्रबारदेखि सुरु भएको केन्द्रीय कार्यसमिति बैठकमा सहभागी हुन जाने क्रममा सञ्चारकर्मीहरूसँग उनले दलको नेतामा आफ्नो दाबेदारी रहने कुरा बताए।
केसीले संसदीय दलको नेतामा आफ्नो दाबी स्वाभाविक रहेको पनि बताएका छन्। उनले भने, “संसदीय दलको नेतामा स्वतः दाबी हुन्छ। म सबैभन्दा सिनियर नेता हुँ। संसदीय अभ्यास र यात्रामा मैले ठूलो योगदान गरेको छु। २०४७ देखिको संसद् कांग्रेसको इतिहासमा पनि म महत्वपूर्ण भूमिका खेलेको व्यक्ति हुँ।”
उनले दलको नेता सहमतिबाट चयन होस् भन्ने चाहना रहेको पनि स्पष्ट पारेका छन्।
