पर्सा । ज्योति सामुदायिक विकास सेवा नेपाल, शाखा कार्यालय वीरगंज–पर्सा द्वारा मानव बेचबिखन विरुद्धको अभियानअन्तर्गत सूचना तथा परामर्श केन्द्र उद्घाटन गरिएको छ। केन्द्र वीरगंज महानगरपालिका–१६, भन्सार गेटको उत्तरपट्टिमा औपचारिक रूपमा सञ्चालनमा आएको हो।
केन्द्र उद्घाटन कार्यक्रम ज्योति सामुदायिक विकास सेवा नेपालका केन्द्रीय उपाध्यक्ष राजन सुनार को सभापतित्वमा सम्पन्न भएको थियो भने प्रमुख अतिथिका रूपमा वीरगंज महानगरपालिका–१६ का वडाध्यक्ष परशुराम चौरसिया उपस्थित थिए।
सभापति सुनारले मानव बेचबिखन नियन्त्रणका लागि सबै पक्षको सहकार्य आवश्यक रहेको र केन्द्रमार्फत जोखिममा रहेका समुदायलाई समयमै सचेतना, परामर्श र सहयोग प्रदान गरिने बताए। प्रमुख अतिथि चौरसियाले स्थानीय तहबाट अभियानलाई पूर्ण साथ र सहयोग रहने प्रतिबद्धता व्यक्त गर्दै यस्ता केन्द्रहरूको भूमिका महत्वपूर्ण हुने उल्लेख गर्नुभयो।
कार्यक्रममा जिल्ला प्रहरी कार्यालय पर्साका प्रहरी नायब उपरीक्षक राजु कार्की, सशस्त्र प्रहरी बल भन्सार सुरक्षा गुल्मका प्रहरी नायब उपरीक्षक विकास अधिकारी, वडा प्रहरी कार्यालय बिर्ताका प्रहरी निरीक्षक विक्रम सुबेदी तथा ज्योति सामुदायिक विकास सेवा नेपाल पर्साका उपाध्यक्ष विजय पासवान पनि सहभागी थिए।
उक्त सूचना तथा परामर्श केन्द्रले मानव बेचबिखन तथा ओसारपसार विरुद्ध जनचेतना अभिवृद्धि गर्ने र पीडित तथा जोखिममा रहेका व्यक्तिहरूलाई आवश्यक सूचना, परामर्श र सहयोग उपलब्ध गराउने काम गर्ने बताइएको छ।
