चितवन — भरतपुर महानगरपालिकाले फोहोर प्रशोधन केन्द्र निर्माणका लागि वन तथा वातावरण मन्त्रालयसँग जग्गा लिने प्रक्रिया अन्तिम चरणमा पुर्याएको छ। महानगरपालिकाले आवश्यक बजेट सुनिश्चित गरिसकेको छ भने वातावरणीय प्रभाव मूल्यांकन (EIA) स्वीकृतिको पर्खाइमा रहेको जनाएको छ।
कार्यवाहक प्रमुख चित्रसेन अधिकारीका अनुसार भरतपुर महानगरपालिका–११ मा रहेको राष्ट्रिय वन क्षेत्रको करिब १६ बिगाह जग्गा भोगाधिकारका लागि तीन करोड रुपैयाँ बजेट कार्यपालिकाबाट सुनिश्चित गरिएको छ।
महानगरपालिकाले यसअघि नै पाँच करोड १९ लाख ७५ हजार रुपैयाँ भुक्तान गरिसकेको छ। मन्त्रालयले वातावरणीय प्रभाव मूल्यांकन स्वीकृत भएपछि मात्रै थप प्रक्रिया अघि बढाउने जनाएको छ।
वातावरण महाशाखा प्रमुख विराट घिमिरेका अनुसार एक रुख कटान गर्दा १० बिरुवा रोपेर पाँच वर्षसम्म संरक्षण गर्नुपर्ने प्रावधानअनुसार सोही प्रयोजनका लागि रकम भुक्तान गरिएको हो। साथै रोपिएका बिरुवाको संरक्षणका लागि थप एक करोड ९० लाख रुपैयाँ बजेट विनियोजन गरिएको छ।
हाल भरतपुर महानगरपालिकामा दैनिक ८० टनभन्दा बढी फोहोर संकलन हुँदै आएको छ। उक्त फोहोर अहिले आँपटारी नजिकको खोल्सामा व्यवस्थापन गरिँदै आएको छ।
फोहोर व्यवस्थापनलाई दीर्घकालीन र व्यवस्थित बनाउन प्रशोधन केन्द्र निर्माणलाई महत्वपूर्ण कदमका रूपमा लिइएको महानगरपालिकाले जनाएको छ।
