काठमाडौं । पछिल्लो तीन महिनामा ६१४ जनाले नेपालको नागरिकता त्याग गरेका छन्। गृह मन्त्रालयले सार्वजनिक गरेको दोस्रो प्रगतिविवरण अनुसार, यस अवधिमा ५६,१३४ जनाले आफ्नो नागरिकतामा रहेको विवरण सुधार वा संशोधन गराएका छन्।
गृह मन्त्रालयका अनुसार नागरिकता त्याग गर्ने मुख्य कारण विदेशमा स्थायी बसोबास, वैदेशिक रोजगारी, उच्च शिक्षा वा विकसित मुलुकमा नागरिकता/सुविधा लिनु हो। गैरआवासीय नेपाली (एनआरएन) नागरिकता प्राप्त गर्ने प्रक्रिया वा विदेशी नागरिकसँग विवाह गरी बसोबास गर्नेहरूले पनि आफ्नो मूल नागरिकता त्याग्ने गरेका छन्।
कानुनी व्यवस्थाअनुसार नेपालले दोहोरो नागरिकतालाई मान्यता नदिने भएकाले विदेशमा स्थायी बसोबास गर्नेहरूले विदेशी नागरिकता लिँदा आफ्नो नेपाली नागरिकता अनिवार्य रूपमै त्याग्नुपर्छ।
यसै अवधिमा तीन महिनामा कुल २,०२,९५६ नागरिकता जारी भएको तथ्यांक छ। वंशजको आधारमा नागरिकता पाउनेको संख्या १,१९,०१२ छ। २६ जनाले अंगीकृत नागरिकता प्राप्त गरेका छन् भने वैवाहिक आधारमा अंगीकृत नागरिकता पाउनेको संख्या ३,३४० रहेको गृह मन्त्रालयले जनाएको छ।
यो तथ्यांकले विदेशी रोजगारी र शिक्षा तथा अन्तर्राष्ट्रिय विवाहका कारण नागरिकता परित्याग गर्ने प्रवृत्ति बढ्दो छ भन्ने देखाउँछ।
