काठमाडौं । अमेरिकाको भर्जिनिया राज्यमा एक नेपाली परिवारभित्र भएको भीषण हत्याकाण्डले समुदाय स्तब्ध बनेको छ।
उदयपुरको बेलका नगरपालिकाका ५० वर्षीय छत्रबहादुर थापाले आफ्नै ५१ वर्षीया श्रीमती बिन्दा थापा र ३१ वर्षीया छोरी ममता थापाको धारिलो हतियार प्रहार गरी हत्या गरेको आरोप लागेको छ। छोरी–ज्वाइँको निमन्त्रणामा अमेरिका पुगेका थापाले सोमबार बिहान Fairfax Countyस्थित एक अपार्टमेन्टमा घटना घटाएको जनाइएको छ।
प्रारम्भिक विवरणअनुसार उनले ३५ वर्षीय ज्वाइँ सन्तोष कुमार बस्नेतमाथि पनि आक्रमण गरेका थिए। गम्भीर घाइते बस्नेतको अस्पतालमा उपचार भइरहेको छ। घटनाका बेला घरमा रहेका एक वर्षीय शिशु भने सुरक्षित रहेको बताइएको छ।
सूचना पाएपछि पुगेको प्रहरीले करिब १० इन्च लामो धारिलो हतियारसहित आक्रमणमा उत्रिएका थापालाई आत्मसमर्पण गर्न पटक–पटक चेतावनी दिएको थियो। तर उनले आदेश नमान्दै प्रहरीतर्फ जाइलागेपछि आत्मरक्षाका लागि चलाइएको गोली लागेर थापाको घटनास्थलमै मृत्यु भएको अमेरिकी प्रहरीलाई उद्धृत गर्दै स्थानीय सञ्चारमाध्यमहरूले जनाएका छन्।
घटनाको स्पष्ट कारण खुल्न बाँकी रहेको छ। सम्बन्धित अमेरिकी सुरक्षा निकायले घटनाबारे विस्तृत अनुसन्धान गरिरहेको जनाएको छ। नेपाली समुदायमा यस घटनाले गहिरो शोक र चिन्ता पैदा गरेको छ।
