माघ १४ – आगामी फागुन २१ गते हुने प्रतिनिधिसभा सदस्य निर्वाचनका लागि जनमत पार्टीको तर्फबाट पर्सा निर्वाचन क्षेत्र नम्बर २ का उम्मेदवार श्याम कुमार गुप्ताले पर्सागढी नगरपालिका वडा नम्बर १ र २ मा घरदैलो कार्यक्रमको औपचारिक सुरुवात गरेका छन्।
यसै अवसरमा जनमत पार्टीको सम्पर्क कार्यालयको उद्घाटनसमेत गरिएको छ। स्थानीय तहमा पार्टी संगठन विस्तार गर्ने र मतदातासँग प्रत्यक्ष संवाद बढाउने उद्देश्यले सम्पर्क कार्यालय स्थापना गरिएको जनाइएको छ।
घरदैलो कार्यक्रमका क्रममा उम्मेदवार गुप्तासहित पार्टीका नेता तथा कार्यकर्ताहरूले स्थानीयवासीसँग भेटघाट गर्दै उनीहरूका समस्या, आवश्यकता र अपेक्षाबारे जानकारी लिएका छन्। साथै जनमत पार्टीका नीति, कार्यक्रम र आगामी योजनाबारे जानकारी गराइएको छ।
उम्मेदवार गुप्ताले जनताको भरोसा र समर्थन प्राप्त गर्ने विश्वास व्यक्त गर्दै पर्सा निर्वाचन क्षेत्र नम्बर २ मा विकास, सुशासन र रोजगारीलाई प्राथमिकता दिने प्रतिबद्धता जनाएका छन्।
पर्सागढी नगरपालिका वडा नम्बर १ र २ बाट सुरु गरिएको घरदैलो कार्यक्रमलाई आगामी दिनहरूमा अन्य वडाहरूमा समेत विस्तार गरिने जनमत पार्टीले जनाएको छ।
