वीरगञ्ज, भदौ १८ – देशमा मौलाउँदै गएको भ्रष्टाचार, बेथिति र शासकीय अकर्मण्यताको विरुद्धमा आवाज उठाउँदै ज्यान गुमाएका जेनजी आन्दोलनका सहिद युवाहरूको स्मृतिमा वीरगञ्जको ऐतिहासिक स्थल घन्टाघरमा दीप प्रज्वलन गरिएको छ।
२०८२ भदौ २३ र २४ गते सम्पन्न ‘जेनजी जेट आन्दोलन’मा सहभागी भएका युवाहरूको निधनको स्मरणमा जिल्ला बचत तथा ऋण सहकारी संघ लिमिटेड, पर्साको आयोजनामा श्रद्धाञ्जली कार्यक्रम सम्पन्न भएको हो।
कार्यक्रममा संघका अध्यक्ष हरेराम पटेलको नेतृत्वमा सहिदहरूप्रति दीप प्रज्वलन गर्दै श्रद्धाञ्जली अर्पण गरिएको थियो। अध्यक्ष पटेलले देश र समाजको परिवर्तनका लागि ज्यान अर्पण गर्ने युवाहरूलाई सच्चा राष्ट्रसेवक भन्दै उनीहरूको बलिदान कहिल्यै नबिर्सिने प्रतिवद्धता व्यक्त गरे।
अध्यक्ष पटेलले भने – “देशमा भ्रष्टाचारले गहिरो जरा गाडेको अवस्थामा युवाहरूले लिएको यो ऐतिहासिक पहल परिवर्तनको बाटो खोल्नेछ।”
कार्यक्रममा संघका वरिष्ठ उपाध्यक्ष जिष्णु बरालले यस्ता आन्दोलन र आवाजको सम्मान गर्नु सबै नागरिकको कर्तव्य भएको बताए। उनले युवाहरूको न्यायको पक्षमा संघ पनि दृढताका साथ उभिएको स्पष्ट पारे।
उपाध्यक्ष बरालले भने – “हामीले यस्ता आवाजको सम्मान गर्नैपर्छ, युवाहरूको बलिदान अन्यायविरुद्धको उदाहरण हो।”
त्यस्तै अर्का उपाध्यक्ष नंगनारायण सिंहले देशमा भ्रष्टाचार चरम सीमामा पुगेको र त्यसको विरुद्धमा युवाशक्ति बाध्य भएर सडकमा उत्रनु परेको बताए। उनका अनुसार आन्दोलनको क्रममा सयौं युवा घाइते भएका थिए भने ८० भन्दा बढी युवाको ज्यान गएको अपुष्ट समाचार रहेको छ।
उपाध्यक्ष सिंहले भने – “युवाहरूले राखेका मागहरू न्यायसंगत छन्, हामी सबैले तिनीहरूको आवाजलाई सम्मान गर्नु जरुरी छ।”
दीप प्रज्वलन कार्यक्रममा स्थानीय नागरिक, सहकारीकर्मी, युवा तथा समाजसेवीहरूको उल्लेखनीय सहभागिता रहेको थियो। सहभागीहरूले सहिदहरूको आत्माको चिरशान्तिको कामना गर्दै देशमा सुशासन र पारदर्शिता कायम गरिनुपर्नेमा जोड दिएका थिए।
