काठमाडौं— सीके राउतले संसदीय राजनीतिबाट सन्यास लिने घोषणा गरेका छन्। तर उनले ‘संघर्षको राजनीति’ भने निरन्तर जारी राख्ने बताएका छन्।
सामाजिक सञ्जालमार्फत आफ्नो धारणा सार्वजनिक गर्दै सीके राउतले संसदीय (पदको) राजनीतिबाट टाढा रहने तर राजनीतिक गतिविधिबाट भने अलग नहुने स्पष्ट पारेका छन्।
उनले लेखेका छन्, “संसदीय राजनीतिबाट सन्यास लिने, संघर्षको राजनीति जारी राख्ने। पार्टीलाई आवश्यकता रहेसम्म नेतृत्व दिँदै अगाडि बढाउने। म सार्वजनिक रूपमा स्पष्ट पार्न चाहन्छु— म संसदीय (पदको) राजनीतिबाट टाढा रहनेछु तर यसको मतलब राजनीतिबाट बीचमै गायब भएको होइन।”
उनका अनुसार उनी राजनीतिमा सक्रिय रहँदै आफ्नो सिद्धान्त र एजेन्डालाई अगाडि बढाउने तथा जनताको हितका लागि निरन्तर संघर्ष गर्नेछन्।
जनमत पार्टी २०७९ सालको प्रतिनिधिसभा र प्रदेशसभा निर्वाचनपछि राष्ट्रिय राजनीतिमा उदाएको दल हो। त्यसबेला पार्टीले उल्लेखनीय सफलता हासिल गरेको थियो। प्रत्यक्षतर्फ अध्यक्ष राउत स्वयं निर्वाचित भएका थिए भने समानुपातिकतर्फ थ्रेसहोल्ड कटाएर पाँच सांसद सिट प्राप्त गरेको थियो।
तर २०८२ फागुन २१ मा भएको पछिल्लो निर्वाचनमा भने पार्टीले कुनै सिट जित्न सकेन। सप्तरी–२ बाट प्रतिस्पर्धा गरेका अध्यक्ष राउत रामजी यादवसँग पराजित भए। पार्टीका अन्य प्रत्यक्ष उम्मेदवारले पनि जित हासिल गर्न सकेनन् भने समानुपातिकतर्फ पनि थ्रेसहोल्ड कटाउन सकेन।
राउतले अब आफू संसदीय राजनीतिबाट टाढा रहेर पार्टीलाई आगामी स्थानीय तथा प्रदेश निर्वाचनका लागि तयार पार्ने बताएका छन्। “जनमत पार्टीलाई आउँदो स्थानीय र प्रदेश निर्वाचनका लागि तयारी गराउन प्रतिबद्ध छु,” उनले उल्लेख गरेका छन्।
यससँगै उनले आफू सधैं जनतामाझ रहने, विभिन्न आन्दोलन र संघर्षमा सहभागी हुने तथा अधिकार र पहिचानको लडाइँमा भूमिका निर्वाह गर्ने बताएका छन्।
इच्छाविपरीत अध्यक्ष बनेको दाबी
राउतले पार्टी अध्यक्ष बन्नु पनि आफ्नो व्यक्तिगत चाहना नभएको बताएका छन्। उनका अनुसार सरकारले काम गर्न नदिएको र जनतामाझ जान रोक लगाएपछि पार्टी गठन गर्ने निर्णय गरिएको थियो।
पार्टी गठनको क्रममा नरेन्द्र प्रसाद चौधरी लगायतका नेताहरूलाई अध्यक्ष बन्न आग्रह गरे पनि उनीहरूले नमानेपछि आफूलाई नै अध्यक्ष बन्नु परेको उनले बताएका छन्।
उनले व्यक्तिगत इच्छाविपरीत दुई पटक संसदीय निर्वाचन लडेको दाबी पनि गरेका छन्। २०७९ सालको निर्वाचनमा विजयी भएका उनी यसपटक भने पराजित भएका हुन्।
