काठमाडौं – नेपालमा पेट्रोलियम पदार्थको आपूर्ति सहज हुने संकेत देखिएको छ। नेपाललाई तेल आपूर्ति गर्ने भारत ले अब रूसी तेल खरिद गर्न पाउने भएपछि आपूर्ति सहज हुने अपेक्षा गरिएको हो।
इरान सम्बन्धी जारी द्वन्द्वका कारण खाडी क्षेत्रबाट तेल आपूर्ति प्रभावित भइरहेका बेला संयुक्त राज्य अमेरिका ले भारतलाई अस्थायी रूपमा रूस बाट तेल किन्न अनुमति दिएको जनाएको छ।
ह्वाइट हाउस का अनुसार इरानसँगको तनावका बीच ऊर्जा आपूर्ति कायम राख्न समुद्रमा पहिले नै लोड भइसकेको रूसी तेल भारतले स्वीकार गर्न अस्थायी अनुमति दिइएको हो।
ह्वाइट हाउसकी प्रेस सचिव क्यारोलिन लेभिट ले मंगलबार आयोजित पत्रकार सम्मेलनमा यसबारे जानकारी दिँदै डोनाल्ड ट्रम्प, अमेरिकी कोष सचिव स्कट बेसेन्ट र राष्ट्रिय सुरक्षा टोलीले संयुक्त रूपमा यस्तो निर्णय गरेको बताइन्।
उनका अनुसार भारतले पहिले प्रतिबन्धित रूसी तेल खरिद बन्द गरेर जिम्मेवार व्यवहार देखाएकाले अस्थायी रूपमा यस्तो अनुमति दिइएको हो।
लेभिटले विश्वव्यापी तेल आपूर्तिमा इरान संकटका कारण देखिएको अस्थायी अभाव पूर्ति गर्न यो निर्णय गरिएको बताइन्। उनका अनुसार समुद्रमा लोड भइसकेको र बाटोमा रहेको रूसी तेल स्वीकार गर्न दिइएको मात्र हो, जसले रूसी सरकारलाई ठूलो आर्थिक लाभ नपुग्ने दाबी पनि गरिएको छ।
