काठमाडौँ — प्रतिनिधिसभा सदस्य निर्वाचनका लागि देशभरका १ सय ६५ वटै निर्वाचन क्षेत्रमा आवश्यक सामग्री पुगेको छ। निर्वाचन आयोग ले प्रत्यक्ष र समानुपातिकतर्फ गरी कुल ४ करोड ११ लाख ५३ हजार मतपत्र ७७ वटै जिल्लाका सबै निर्वाचन क्षेत्रमा पुर्याइसकिएको जनाएको छ।
आयोगका सहायक प्रवक्ता कुलबहादुर जिसी का अनुसार मतदानका लागि आवश्यक अन्य सामग्री सम्बन्धित जिल्लामै व्यवस्थापन गरिनेछ। निर्वाचन अधिकृतको कार्यालयबाट मतदान अधिकृतको जिम्मामा सबै सामग्री पठाइने प्रक्रिया अघि बढाइएको आयोगले जनाएको छ।
आयोगले स्वीकृत कार्यक्रमअनुसार मतदाता शिक्षासम्बन्धी विशेष अभियान फागुन ३ गतेदेखि सञ्चालन गरिरहेको छ। यो अभियान फागुन १७ गतेसम्म देशभरका ७ सय ५३ पालिकाका ६ हजार ७ सय ४३ वडामा निरन्तर सञ्चालन हुने जनाइएको छ। मतदातालाई सही तरिकाले मतदान प्रक्रिया बुझाउने, मतपत्र बदर हुन नदिन सचेत गराउने तथा निर्वाचनप्रति सकारात्मक सहभागिता बढाउने उद्देश्यले कार्यक्रम सञ्चालन गरिएको आयोगले स्पष्ट पारेको छ।
यसैबीच निर्वाचन आचारसंहिता अनुगमन तथा परिपालनामा समेत निरन्तरता दिइएको छ। केन्द्रीय आचारसंहिता अनुगमन समितिलगायतका संयन्त्रहरू सक्रिय रूपमा परिचालित रहेका आयोगले जनाएको छ।
फागुन ४ गतेदेखि राजनीतिक दलहरूले चुनावी प्रचारप्रसारलाई तीव्र बनाएका छन्। प्रचारप्रसारलाई शिष्ट, मर्यादित र आचारसंहिताअनुरूप बनाउन आयोगले दल तथा उम्मेदवारहरूलाई निर्देशन दिइसकेको जनाएको छ।
